KALAPURANA

Awighnam Asthu!

Iti kalapurana, maka purwaka sang hyang siwa ring swarga siwaloka, kawuwusen bhatara siwa, ana putranira kalih siki laki-laki, kang panuwa sang hyang kala, kadi tapning raksasa warnanira, kang ari sang hyang pancakumara ngaranira, kari rare, apekik warnanira, sira bhatara kala duk mijil sandyawela, ri dina wrespati, pon, wara wayang. Sang hyang pancakumara duk mijil sedek prabata, ring dina, tja, kliwon, wara wayang.

Sang hyang kala matapa ring sema stananira. Ika rare sang hyang pancakumara, kari aneng swarga, iningu de yayah ira bhatara siwa. Mangke tucapa sampun aluhur sang hyang kala, wineh nugraha de hyang kasuhun kidul, wenang anadah wang, sawijil ing wara wayang, salwir ing wang lumaku tengah ngwe bener, mwang wang lumaku ring sandyawela, mangkana panugrahan ira sang hyang kasuhun kidul.

Dadi menget bhatara kala, ring kadarmanira, apan ana arinira pareng mijil ring wuku wara wayang, wenang pinaka tadahnira, apan sang hyang pancakumara aweton wuku wara wayang, ring dina, ca, kliwon. Yatika denira sang hyang kala manangkil i yayah ira bhatara guru, satekan ireng swarga, pranamya ta nembah i jeng ira bhatara siwa, mojar bhatara siwa ring sutanira; ‘duh anaku hyang kala, bage kamayangan tekan ta ring rama ya bapa, aparan prayojanan ta, dak warah ri bapan ta, manawi wonten pamidin ta ri kami.’ Ling sang hyang kala; ‘singgih doning padgata kala anak ta dating, ulun aminta tadahan ri jeng bhatara, kadi pasung ira sang hyang kasuhun kidul ri pinakang hulun, manawa wruhe jeng bhatara, aneda kang rare si pancakumara arin ing hulun, tinadah mami, apan wetunya sang aweton ring tumpek wayang, wang aweton mareng wuku wara wayang, pinaka laba mami.’ Mangkana ling sang hyang kala.

Sumawur bhatara siwa; ‘lah ya ta anaku hyang kala, kaya lingmu ri kami, hulun nugraha, mene ana pasamayang ku ri kita laki, lamakane kita amangguh ayu katekeng jemah, kita tan wenang anadah wang yang during akupak, away kita anadah antekena rumuhun.’ Mangkana ling bhatara siwa, masinggih hyang kala, manembah amwit ri pada bhatara siwa, ling bhatara; ‘rahayu tanaku yang mangkana.’

Henengakena ikang kata sakareng, watara wonten limang tahun, menget bhatara kala ri samaya, umedek muwah, ring jeng bhatara guru, muwah aminta sanake sang pancakumara. Ling bhatara; ‘ana patanggeh mami ri kita anaku, malih akajeng, antya kena denta.’ Ling sang hyang kala; ‘anak paduka bhatara anuhun, muwat amwit sang hyang kala, muwah ri wesma nira nguni.’ Ucapa bhatara siwa amecikana putranira, sang hyang pancakumara, winastwan de bhatara guru, tan wenang atuha, kewala rare juga, tucapa huwusnya sakajeng, muwah datang bhatara kala, manangkil i bhatara guru, aminta sang hyang pancakumara, mangkana ling bhatara siwa asung wacana ring putra nira; ‘kamung anaku sang pancakumara, tan urung kita mangke, tinadah de kakan ta sang hyang kala, ri tekaning dia caniscara kliwon, wayang, kunang mene ana pangupayangku, pamahayu sariranta, wenang tinular i wang ring mrecapada, katekeng delaha. Mangke ana mami rumenga wreta sajati, ana rakwa ratu lewih ring madyapada, maka ngaran prabhu mayasura, ratu jumeneng ring kretanagara, marangka kita anaku, amenda mekula kita, aminta sraya ri sira, maka pangileng urip ta, apan kakan ta hyang kala, malih tigang dina mangke, ring caniscara, kliwon, wayang, arep anadah sariranta, lah age kita tumurun mareng mercapada, angulati ratu ring Kretanagara. Neher winastwan ta sang pancakumara, astu kita anaku dirgayusa pari purna.’ Mangkana ling bhatara siwa.

Anembah amwit sang pancakumara, mintar turun ring madyapada, dumunungeng bumiu Kretanagara, jumujugeng pura nira sang prabhu mayasura, sedang tinangkil ing bahudanda nira kabeh. Ta danantara, datang sang hyang pancakumara, makidupu sumungkemi pangkwanira sang prabhu, kagyat sang nata mayasura, agya atanya ri sang wawu prapta, ling ira; ‘i aparan kita wong rare teka sumungkem i kisapwangku, saha tawan-tawan tangis, lah warahakena.’ Mojar sang rare cili, maka ngaran panca kumara, tan ana waneh don mami dating, aminta sraya angilen ri jeng maharaja, sawet ning ana kakangku sanak matuha, wineh nugraha ring sang hyang kasuhun kidul, sinung nugraha amangan wang, asing aweton wuku wara wayang, wenang tinadah de sang hyang kala, hulun aweton ring dina caniscara kliwon wayang, yatika donya nakta, prapta, aminta sraya mengilen rijeng sri naranatha, lamakane kari angesang, mangkana ling sang panca kumara. Ujar sang prabhu, uduh anakku sang panca kumara, yan mangkana, kami angilekena kita. Irika ta sang para mantri kabeh, kapwa sumungsung sadateng sang panca kumara, pada awelas ri sira. Mojar sang prabhu mayasura, duh masku sang panca kumara, away sangsaya, ingke angilen ri kadatwan mami, munkari agesang yeki si mayasura, mangke kami makon ring tanda mantri kabeh, angatag pwe kang peka yoda, prasama rabdang sanjatam kita daran maraheng dalem puri, prayoda mami mengemit kiteng yawa, tumandang i sadatang sang hyang kala, arep mami amagut kasinga wikrama ne sang hyang kala, mangkana ling ira sang prabhu, tandwa tinuntun sang panca kumara, maraheng jero kadatwan, henengakena.

Tan dwa kinon de sang prabhu, anabeh teteg agung, saha rabdang sanjata, kinon angider i puri sang prabhu, kinon amagut satekan ira sang hyang kala. Amangke sampun ira sang panca kumara, angilen ring kadatwan ira sang prabhu mayasura.

Tucapa muwah bhatara kala, apan teka samaya sangketa nira nguni, ri tekaning dina, caniscara, kliwon, wayang, lumaris sang hyang kala, manangkil i bhatara guru, umungwakena waneng sangketa nira nguni. Ling bhatara siwa, lah menget kami sobayang ku kita laki, mangke kami asung nugraha, kaya pamuhun ta ri kami, anadah sang panca kumara, lah ruruhen den ta, apan yan uminggat sangkeng swarga, Manawa turun mareng mrecapada, irika baksan ta, apan aramih ana ring swarga, yan kita ingke amangan wang, mangkana ling bhatara guru. Dadya amisinggih sang hyang kala anembah amwit ri jeng bhatara guru.

Tucapa ri lampah sang hyang kala, tumurun mare mrecapada, irika bhatara guru, mangen angen kahaywan i putranira, amastu denya amanggih kadirgayusa.

Tucapa ri datang sang hyang kala aneng madyaloka, kahambung-hambung ne sang panca kumara, apan anang wijayamala, mara wonten ing bhumi Kretanagara, jumujug sira ng kana, kapanggih punang wong pada sregep anengen sanjata, wawang hyang kala matanya rikang wang agelar kabeh, boh kamung manusa kabeh, angapa don ta amanguna gelar, sangkep ing wara yuda, saha busana ning aperang, sang apa satrun ta warahen ta ku de mu kabeh, lamakane ngong weruha, mangkana patanya sang hyang kala. Mojar sang tinakwanan, kami kinon de sri maharaja, manglagana kamung kala, kinon amejahana kamung, dosanta anadah wang. Sumahur sang hyang kala, langgah ujarmu kamung manusa, wehana sang panca kumara, mula tatadahan ingong, agawe paran gumegeti sang panca kumara, mula baksana ning ngong, yan tan sawehan mu, masa kamung huripa den i ngong, sawur manuk kang prayoda kabeh, ah tan paweh nghulun, irika kroda sang hyang kala, pinupuh tang para yoda kabeh, rinebut sang hyang kala, dening prajurit eng Kretanagara, tan pangrat sengit sang hyang kala tiniban wara sanjata, malayu wadwa kabeh, sesaning mati, akweh atawankanin, rinujak de sang hyang kala, tan ana wani mulat ngaranya, ana umaturi sang prabhu, ryalah tang pekayoda, aperang lawan sang hyang kala, irika sang prabhu mahasura, gelis mantuk sakeng watangan, marahe dalem puri, mawuwus i sang panca kumara, kinen angilen sakahyun ira, mojaraken wadwa nira sampun alah, muwah ling sang prabhu, ri sang panca kumara, ndah mangke nghulun mamwat pejah, tumangguh i kita, tumandang i pamuk sang hyang kala, muliheng wiraloka. Mangkana pawekas sang prabhu mayasura, tucapa sang prabhu, atanding kadiran kamawan sang hyang kala, njorok jinorok, yan pira kunang swenira yuda, pejah sang prabhu tan pasara. Annuli angranjing sang hyang kala ri jero ning kadatwan, rinuru sang panca kumara, masowe nora kapangguh, dadi inambung de bhatara kala, wijayamala nira, cihna ni dewata, huryan i sampun mijil sang panca kumara, binuru nira muwah, dadi kapanggih ring marga agung, atawan tangis sumambe bhatara, tan dwa sinikep de bhatara kala, neher anela, tan katakana.

Tucapa bhatara siwa, rumenga pasambat I putra nira, sigra tumurun paren lawan bhatari sri, anglinggih I lembu lanang sweta warna, mijil saking ambara, irika bhatara guru, amastu sang hyang kala, umutah, lingira astu sang hyang kala umutah, dumaleg sang hyang kala, dadi mijil sang hyang panca kumara, malayu tan pamput-amputan, ilang tan pajamuga, kapanggih bhatara siwa akalihan lawan bhatari sri, anitihi lembu lanang sweta warna, lumaku tengah ngwe bener, kamantyan kroda nira sang hyang kala, arep anadah bapa ibu nira, umangang tutuknya kadi singha rodra, annuli mojar bhatara siwa, lingnira, ih aja kita anadah bapa ibunta. Ujar sang hyang kala, dah salah lampah bapa ibungku, asing wang lumaku-laku masa tengah ngwe bener, wenang tinadah mami, mangkana ling sang hyang kala. Mawuwus bhatara siwa, lah ya wenang kaya ling ta, nanghing yan kena den ta njepani cacangkriman mami, mangke bapanta ngawistarakena, yan kena denta, tadah bapa ibun ta, teka ning lembu ning hulun. Misinggih sang hyang kala, ling bhatara siwa, slokha;

Astapada sasti karno
Dwi srennggi sapta locanam
Catur buja trinabinca
Eka baga dwi purusah.

Maswe bhatara kala, umangen-angen lwir ing sapta locana, tan wruhnya ri soca ning kalpika kara sanunggal, lyan sangke rika, kena de nira anjepani tan dwa swe pitungka sang hyang kala, lawan bhatara siwa, anjapani cacangkriman sang bapa, yan amesem ri dalem ati swacita bhatara bhatari, ri kemengan sang hyang kala. Tan dumade, sayan lumingsir palaku sang hyang, wande bhatara kala manadah bhatara bhatari, apan ya alah acacangkriman de bhatara siwa, mur bhatara bhatari mulih eng siwapada muwah.

Tucapa bhatara kala, muwah inambung gandane, wijayamala hira sang panca kumara, binuru nira muwah, dadi ana wang anlesang lalang ring nadi, kari mabanda kalih, katon sang panca kumara, sumurup ri tengah ing alalang, tan dwa sinambut ikang alalang, linukar de nira, humesang sang panca kumara muwah ring doh, krodha bhatara kala, winastwan ikang wang aneles i alalang atali kalih, ujare, syapa jwa ngenceba alalang matali dwa, nora nuculan talinya lagi manunggal, astu wang mangkana mene katekeng jemah, tan pawali dadi janma muwah. I telah mangkana, muwah binuru sang panca kumara, katon angepep ri sor ing kalumpu, ri sornya, ana indan aking, sahang ikapinesel tan inuculan talinya, irika sumurup sang panca kumara annuli ginogo de bhatara kala, dadi meleca sang panca kumara, muwah malayu mareng doh, krodha sang hyang kala, tur amastu. Nyen jwa ngedang sahang boten jinenge, twara mbusana taline, astu tan dadi janma mwah.

Muwah kaburu sang panca kumara katon sumurup ri cangkem ing standila, muwah ginogo de bhatara kala, dadi meleca karirun, apan nora tinutupan rirunya, krodha bhatara kala, tur amastu. Nyen jwa mapunpun twara ngempetin rirune, wastu tan pandadi janma muwaah.

Mangke tucapa sampun sandekala, nora kapanggih sang panca kumara, binuru de nira. Dadi ana kapanggih, wang matukar lawan sanaknya, neher binaksa de sang hyang kala, tur winastu kang rat, syapa juga ingkang wang, marebat masa sandekala, wenang ya tinadah de ningong, mangkana tantu bhatara kala, muwah rinuruh sang panca kumara katekan ratri masa ning tengah wengi, ana wang dalang angwayang, nemonin wuku tumpek wayang, sang anama enpu leger ngwayang, sampun angarepakena wayang, saha juru redepnya, wus tinabeh, swara nira manis arum. Kancit datang bhatara kala, amuru sang panca kumara, anangis sang panca kumara, amelas arsa, ngasraya minta urip, les sumungkem ri pangkwaning sang dalang, dadi kagyat empu leger, tur angeling, duh syapa dewa kumureb ring kisapwan kune, ling sang tinanyan, hulun mangaran sang panca kumara, anakira bhatara guru, aminta urip ri sang pangempwan, nghulun maya tinadah de kaka ning hulun bhatara kala, sinung nugraha ri sang hyang kasuhun kidul, salwir ing wang aweton ri wuku wara wayang, hulun metu ring dina caniscara, kliwon, wara wayang, ya tika pangasraya mami ri sang pangempwan, angeling empu leger, duh masku awelas aku ri kita, hulun mangilwanen kita, sinambat sang panca kumara, sinurupaken ring lyang ing pring palawah ing redep, redep nga; gender. Tan kocapa empu leger muwah ngwayang, anutugaken palakwaning carite nguni. Sedeng ramya nikang wayang, jag dateng sang hyang kala, jumujug mareng banten, dahat lapa wlekang, tan dwa binaksa salanlaning babangkit kabeh, enti tanpasesa de nira, widi widana ning ngwayang, dadi katawurag sang angwidu, mwang juruning mradangga, teka ning wong anonton, pada andulu warna nira sang hyang kala, kadi trap ning raksasa ngawatara, ireng warnanya, bang rambutnya, muriring awrut-awrutan, socanya lwir teja ning wintang tumambaga, ageng aluhur pangadegnya, amaya-maya jati sira. Mojar mpu leger, agawe paran paduka bhatara kala, jag umangan pabanten ingsun, nguniweh during huwusan manira angwayang, ring endi mami ngamet widi-widana muwah, ling bhatara kala, wehen tadahan mami sang panca kumara, apan kita umungupaken ringke, ya do ning hulun umangan pabanten ta, kamu wong dala salah, sawur empu leger, ndiana wong maweh, yan during ana paminta, satrunta sang panca kumara ngasrayeng urip ri kami, yan ana paminta ta rumuhun, wenang kami paweh tan paweh, apan during ana pamintanta ri kami, jag baksa pabanten ing nghulun, bhatara kala salah, yan suluhin ring dharmasastra, pamutus ira batara manunguni, pasilihan pabantening hulun mangke, bhatara kala kahehan de ning hulun, kang abecik mangke, paduka bhatara asung nugraha ri pinaka nghulun, pakena ning jagat kabeh, denya wruha, pasampriti ning hulun kalawan kita, mene purwakanya, wang anawur hutang ri kita, salamlam ing pabangkit den agenep, salwir ing wang aweton ring wuku wara wayang, marya kita manadah iriya, yan Tanya manawur hutang ri kita, sakahyun ta bhatara kala, maka mimita, sanak ta sang panca kumara, kasampurna de bhatara kala, kawruhana de ning wang kabeh, unggwaken ring rerepi nugraha ta ri nghulun, kawruhana de ning wang kabeh teka delaha, wedaran ku sanakta sang panca kumara, away suma, winetwaken sang panca kumara de empu leger.

Irika somya wat ira bhatara kala, suka ambaksa sang panca kumara, sampun karena sojar ira empu leger, sangke jerone talawah, wenang maka pakretining jagat, masiheng salira nira, mur sang panca kumara mantukeng swargaloka, kari empu leger angucap-ucap lawan bhatara kala, duh bapa empu wong amangku dalang, wadu ngaran ta waneh, kawruhana de ning wang, kasuguhan ta amangku dalang ngaranta, kreta nuraga ki ring rat, maha budhi metri karuna swabhawanta ri rat kabeh, maka purwaka sakak mami, sampritan ta ri nghulun, masinggih mami sawuwusta, pagehakena kita amangku dharma pawayangan. Nityasa mengeta kita ri kami, wenang kita nibaken panglukatan ira empu leger katekeng jemah, iri pangabantenya nimitanya kadi dangu.

Iti pabanten panglukatan mpu leger, lwirnya; angadekakena sanggar tutuan, munggah suci 2, soroh, genep salamlam ing banten suci kadi dangu, ring sornya, pabangkit asoroh, genep saruntutan ing pabangkit kadi dangu, ma arta 4500. muwah caru sor ning sanggar tutuan, sata manca warna, olah anut urip kadi dangu, walulangnya laying-layang, seganya anut urip amanca desa. Malih banten penebasan sang aweton, angadekaken lahapan mabucu tiga, munggah suci asoroh genep, maulam itik mabe tutu genep salamlam ing suci kadi dangu, sasalah arta 1700, muwah bantene ri sornya, penek putih 5, iwaknya sata putih winangun urip. Muwah sanggah cukcuk 2, genahang ring tangun-tangun kelire, malamak magantung-gantungan, munggah banten tumpeng pada madanan, kembang pahyas, lenga wangi burat wangi, sarnanya sakabwatan.

Muwah banten sang mangawayang, suci 1, saruntutan ipun genep kadi dangu, iwaknya itik mabe tutu, saha pula gembal, masekar taman, pajegan 1, canang pangkon, daksina sarwa 4, m arta 500, peras panjeneng, segehan agung. Wadah tirta panglukatan sang empu leger, sangku suda-mala, matatakan beras, benang, arta 225, mwang sekar mawarna 11 warna, mwang rwi-rwi, samsam bija kuning, telas.

Tucapa mangke bhatara kala, agendu rasa, kalawan empu leger. Ling empu leger, pukulun paduka bhatara kala, mangke yatika bantene anggen manira, panyampurna krodha bhatara ri anten ta, sang anama sang hyang panca kumara, pinaka panyuda mala geleng bhatara, muwah teka ring delaha, yan ana rare metu ring wuku wara wayang, yan tan ana waline, banten pamukum jiwa ri bhatara, mawali dening panglukatan empu leger, yan tan mangkana, mangka wenang hyun bhatara, anibani danda, anggeringi adyapi tinadah de bhatara, akahyun ta wenang, anangkaleni, winastun ta, tan pandadi janma muwah, atmanya dadi byu kahikik, tumuwuh tengah ing alas. Kunang wange yan sampun malukat ring wayang, de ning panglukatan empu leger, away bhatara anangkaleni, mwang anadah, mangkana basamane empu leger ri jeng bhatara kala.

Masinggih bhatara kala, mojar bhatara kala muwah, lah ya empu dalang, I wruha pwa kita, yan ana wang malaku tengah ngwe bener, lumasa sandekala, lungha masa ning tengah wengi, ika wenang ngong anadah, pinaka bela ning hulun, panugraha nira hyang kasuhun kidul, mangkana ling bhatara kala, mawuwus empu dalang, sakaharep de bhatara pukulun. Telas mangkana nubaya hitan ira sang rwa, mur bhatara kala, mulih ing stana nira nguni, empu leger huwus angringgit, wong kabeh pada mulih kuwu nira sowang-sowang. Telas. Iti kalapurana.

Dipun pethik saking bundel lontar kagunganipun Bapak Wongso Bojro