NAGARAKRTAGAMA

[Pupuh 1]

 

1.      Om nathaya namostute stuti ning atpada ri pada bhatara nityasa

Sang suksme teleng ing samadhi siwabuddha sira sakalaniskala atmaka

Sang sriparwwatanatha natha ning anatha sira ta pati ning jagadpati

Sanghyang ning hyang inisty acintya ning acintya hana waya temah nireng jagat.

 

2.      Byapi byapaka sarwatatwagatha nirguna sira ring apaksa waisnawa

Ring yogiswara poruseng kapila jambhala sakala siran hyang ig dhana

Sri wagindra siran hyang sakalasastra manasiya sireng smaragama

Ring wiginotsaranaprayoga yamaraja sira maka walang jagaditha.

 

3.      Nahan don ing umastuti pada nirahyun umiketa kateng nareswara

Sang sri natha ri wilwatika haji rajanagara wisesa bhupati

Saksat janma bhatara natha siran anghilangaken i kalangka ning praja

Hentyang bhumi jawatibakti manukula tumului i tekeng dighantara.

 

4.      Ring sakartusarena rakwa ri wijil nrpati telas inastwaken prabhu

An garbbheswaranatha  ring kahuripan wihaga nira namanusadbhuta

Lindung bhumi ketug hudan awu gereh kilat awiletan ing nabhastala

Guntunr tang himawan ri kampud anana ng kujana kuhaka mati tanpagap.

 

5.      Nahan hingan iran bathara girinatha sakala matemah prabhutama

Na lwir sadeg irekanang sa yawabhumi talu tumungkul adara

Wipra ksatriya waisya sudra caturasrama sama nipuneng samahita

Hentyang durjana mariabuddhi kala kewala matakut i wirya sang prabhu.

 

[Pupuh 2]

 

1.      Ndan sang srirajapatni prakasita sira matamaha sri narendra

Sang lwir pawak bhatari parama bhagavati chatra ning rat wisesa

Utsaheng yoga buddhasmarana gineng iran siwari wrdhamundi

Ring saka drstisaptaruna kalaha niran mokta mungsir kabuddhan.

 

2.      Riantuk srirajapatni jinapada kawekas duhkitang rat byamoha

Ri adeg natha munggwing majapahit tumului tustha mengong kabhaktin

Rena sri natha sang sri tribhuwana wijayottunggadewi gumanti

Mungguing rajyarikang jiwanapura sira tamwangmwangi sri narendra.

 

 

[Pupuh 3]

 

1.      Tekwan bhakti siran makebu ri sira sri rajapatnesvari

Satyanut brata paksa sogata masangaskara dagan sang pejah

Tansah srikrtawardhaneswara pita de sri narendradipa

Se dampati apageh sireng sugatamargangde suka ning jagad.

 

2.      Ndan sribhupati sang pita nrpati munggwing singhasari apageh

Saksat hyang wara ratnasambhawa siran manggeh parartheng jagat

Dhirotsaha sire kawrdddhya nikanang rat satyabhaktye haji

Lagi anggegwani karyya (ning) sahana kadhyaksatidakseng naya.

 

[Pupuh 4]

 

1.      Muwah ibu haji sang narendranuja de hajing jiwana

Prakasita haji rajadewi maharajasanindita

Sirata siniwi ring dahanopameng (ru)pa ring sadguna

Samasa(ma) kalawan hajing jiwana lwir sudewi apalih.

 

2.      Priya haji sang munggw i wengker bangun hyang upendra nurun

Nrpati wijayarajasanopameng paramajnottama

Samasama kalawan nrpe singghasari ekapaksapageh

Sira widhikan i thani yawat sabhumi jawa.

 

[Pupuh 5]

 

1.      Wwanten  tari haji ri wilwatikta rajni

Sang munggw ing lasem anuraga ring karahaywan

Putri sri narapati ring daha prakasa

Sang sri rajasaduhitendudewi anindya.

 

2.      Ndan sri warddhanaduhiteswari pamungsu

Rajni mungw ing pajang anopameng raras rum

Putri sri nrpati ri jiwana prakasa

An saksat anuja tekap nirang narendra.

 

[Pupuh 6]

 

1.      Penak sri naranatha kapwa ta huwus labdhabhiseka prabhu

Sang natheng matahun priya nrpati sang rajyeng lasem susrama

Sang sri rajasawarddhana prakasiteng rupadhiwijneng naya

Tan pendah smarapinggala patemu sang nathenalem ing jagat.

 

2.      Sang natheng paguhan priya nrpati sang rajni pratiste pajang

Khyati sri nrpa singhawarddhana surupanwam susilapageh

Asri awarnna sanatkumara saha dewida papanggih nira

Bhakti jong haji masih awwang anak angde tusta ning nagara.

 

3.      Tekwan wrddhi awekendra sang umunggw ing wirabhumi angdiri

Sang sri nagarawarddhanai pratita rajnikanyakanopama

Ndan ranten haji ratw ing mataram lwir hyang kumaranurun

Sang sri wikramawarddhaneswara paningkah sri narendhradhipa.

 

4.      Wungsu sri nrpati pajang siniwi munggw ing pawwanawwan puri

Rajni sri surawarddhani nwam ira wala lwir hajeng ing tulis

Sakweh sri yawaraja sapada madudwan nagaratunggalan

Ekasthana ri wilwatikta mangisapwi sang narendradhipa.

 

[Pupuh 7]

 

1.      Warnnan sri naranatha kastawan ira n dinakarasama digjaya prabhu

Bhrasta ng satru bangun tamisra sahane bhuwana rinawasan nareswara

Tustang sajjna pangkajamam ikanang kujana kumuda satya satwika

Sthiti ang grama sabhumi awah dhana bangun jala hinaturakenya sakrama.

 

2.      Lwir sang hyang satamanyu manghudani rat haji tumulaki duhka ning praja

Lwir hyang pitrpati kadandan ing anaryya baruna ri katemwan ing dhana

Lwir hyang bayu sirantameng sakalaloka makasarana duta nityasa

Lwir prtiwi ri karaksan ing  pura katonan ira kadi bhatara candrama.

 

3.      Ring warnnakrti kamadewa sakalanurun umulati ramya ing puri

Sakweh sang paraputerekadika wadhu haji kadi pawibhajyan ing ratih

Ndan sang sri parameswari swaduhita nrpati wijayarajasottama

Mukyawarnna susumnadewi anupameng hayu tuhu sawawe nareswara.

 

4.      Takwan wrddhi siran pakanak i sireng nrpati kusumawarddhaniswari

Rajni rajakumarii anindya siniwing pura ring kabalan utameng raras

Sang sri wikramawarddhanendra saniruktya nira pangucap ing sanagara

Saksat dewata dewati sira n atemwa helem anukani twas ing jagat.

 

[Pupuh 8]

 

1.      Warnnan tingkah ikang paradbhuta kutanya batabang umider mmakandel aruhur

Kulwan dik purawaktra mangharepaken lebuh ageng itengah wai edran adalem

Bhrahmasthana matunggalan pathani buddhi jajar inapi kapwa sok cara cara

Ngka tonggwan paratanda tanpegat aganti kumemiti karaksan ing purasabha.

 

2.      Lor ttang gopura sobhitabhinawa konten ika wesi rinupakaparimita

Wetan sanding ikarjja panggung aruhur patiga nika binajralepa maputih

Kannah lor kkidul ipeken raket ikang yasa wekas ing apanjang adbhuta dahat

Angken caitra pahoman ing balasamuha kidul ika catuspathahyang ahalep.

 

3.      Alwagimbar ikang wanguntur icatturddhisi watangan ika witana ri tengah

Lor ttang wesma panangkilan parabhujangga kimuta paramantri alenggih apupul

Wetang nggwan para siwa boddha mawiwada mucap aji sahopakara weki sok

Prayascitta ri kala ning grahana phalguna makaphala haywa ning sabhuwana.

 

4.      Kannah wetang ikang pahoman ajajar ttigatiga ri tengah kasaiwan aruhur

Nggwan sang wipra kidul padottamasusun barat inatar ikabatur patawuran

Nggwan sang sogata lor susun tiga tikang wangunan ipucak arjja mokirukiran

Kapwanjrah  racananya puspa pinaran nrpati satata yan hinoma mapupul.

 

5.      Ngkaneng jro kidul ing wanguntur ahelet palawangan ikana pasewan atata

Wesmarjjjajajar anghapit hawan angulwan i tengah ika tanjung angjrah asekar

Ndah kulwan mahelet muwah kidul ipanggung ika bala maneka medran itepi

Arddhalwa ri tengah natar nikana mandapa pasatan asangkya lot mawurahan.

 

6.      Ri jronyeki muwah pasewan ikidul dudug angusi wijil kapingrwa ri dalem

Tingkahnyeki tinumpatumpa mahelet palwangan ikanang sapanta tinika

Kapwang wesma subaddha watwan ika len saka balabag usuknya tanpa cacadan

Sek de ning bala haji anangkil agilir makemitabu mapeksa wara matutur.

 

[Pupuh 9]

 

1.      Nahan lwirnyang manangkil pangalasan ingaran kwehnya tanpapramana

Tanpalwir nyu gading janggala kadiri sedah panglarang rajadewi

Wai sangka wwang panewwan krtapura sinelir mwang jayeng prang jayagong

Angreyok kayuapu wwang jaladhi masuruhan samajadhi prakirnna.

 

2.      Nahan tadhinya munggwing watangan alunalun tanpegat lot manganti

Tanda mwang gusti wadwa haji muwah ikang ammwang tuhan ring yawabap

Mukyang munggwing wijil pingkalih adhikabhayangkari apintapupul sok

Lor ning dware dalem nggwanya kidul ika paraksatriya mwang hujangga.

 

3.      Ngkaneng bayabya ri pascima mider umareng mrtyudesa yasakweh

Sarsok de sang sumantri amawa pinituha ring wirabhrtyan panangkil

Anyat kannah kidul pantaran ika lawangan mandapa mwang grhakweh

Sarsok de bhrtya sang sri nrpati ri paguhan nityakalan pasewa.

 

4.      Ngkana jro ning wijil pingkalih areja natarnya ratalwatisobha

Sok wisma mwang witanabhinawa mapupulan sang manangkil mareng jro

Wetan tekang grhanopama wangunan ikasri aruhur sopacara

Nggwan sri nathan paweh sewa ring umarek umunggwing witanaprameya.

 

[Pupuh 10]

 

1.      Warnnan warnna ni sang manangkil irikang witana satata

Mantri wrddha pararyya len para pasangguhan sakaparek

Mwang sang panca ri wilwatikta mapageh demung kanuruhan

Tansah rangga tumenggung uttama ni sang marek woki penuh.

 

 

2.      Kwehning wesa puri kamantryan ing amatya ring sanagara

Don ing bhasa parapatih parademung sakala n apupul

Anghing sang juru ning watek pangalasan mahingan apageh

Panca kweh nira mantri anindita rumaksa karyya ri dalem.

 

3.      Ndan sang ksatriya len bhujangga rsi wipra yapwan umarek

Ngkane heb ning asoka munggwi hiring ing witana mangadeg

Dharmadhyaksa kalih lawan sang upapatti saptadulur

Sang tuhwaryya lekas niran pangaran aryya yukti satirun.

 

[Pupuh 11]

 

1.      Na lwir sang marek ing witana pinake dalem inapi rinangga sobhita

Ring jro purwwa sake wijil pisan adoh piningit ikang umanjinge dalem

Ndan sang sri nrpati singhawarddhana kidul saha yugala saputra putrika

Lor sang sri krtawarddhaneswara bangun surapada tiga tang purapupul.

 

2.      Sakweh ning grha nora tanpasaka mokir ukiran apened winarnnana

Mwang tekang batur asmawistaka mirah winetu wetu pinik rinupaka

Njrah tekang wijil ing kulala pinakottama ni hatep ikang grhadhika

Tanjung kesara campakadi nikanang kusuma caracara njrah ing natar.

 

[Pupuh 12]

 

1.      Warnnan tingkah ikang pikandel atata tut kanta ning nagara

Wetan sang dwija saiwa mukya sira dang hyang brahmarajadhika

Ngkaneng daksina boddha mukya ng anawung sang kaka rengkannadi

Kulwan ksatriya mantri punggawa sagotra sri narendradhipa.

 

2.      Weta(n) den mahelet lebuh pura narendreng wengker atyadbhuta

Saksat indra lawan saci nrpati lawan sang narendreng daha

Sang natheng matahun narendra ri lasem munggwing dalem tan kasah

Kannah daksina tan madoh kamegetan sang natha sobhahalep.

 

3.      Ngkaneng  uttara lor saking peken agong kuwwahalep sobhita

Sang saksat ari  de nareswara ri wengker sang makuww apageh

Satyasih ri narendra dhira nipuneng nityapatih ring daha

Khyating rat mangaran bhatara narapati angde halep ning praja.

 

4.      Wetan lor kuwu sang gajahmada patih ring tiktawilwadhita

Mantri wira wicaksaneng naya matenggwan satya bhaktya prabhu

Wagmi wak apadu sarjjawopasama dhirotsahatan lalana

Rajadhyaksa rumaksa ri sthiti narendran cakrawartting jagat.

 

5.      Nda ngkane kidul ing puri kuwu kadharmadhyaksan ardha halep

Wetan rakwa kasaiwan utama kabodhan kulwan asri atata

Tan warnnan kuwu sang sumantri  adhika len sang paraksatriya

Dening kweh nira bheda ri sakuwu kuwwang de halep ning pura.

 

6.      Lwir ccandraruna tekanang pura ri tikta sriphalanopama

Tejanggeh nikanang kara sakuwukuww akweh madudwan halep

Lwir ttaragraha tekanang nagara sesa nneka mukya ng daha

Mwang nusantara sarwwa mandalika restrangasrayakweh marek.

 

[Pupuh 13]

 

1.      Lwir ning nusa pranusa pramuka sakahawat ksoni ri malayu

Ning jambi mwang palembang karitang i teba len dharmasraya tumut

Kandis kahwas manangkabwa ri siyak i rokan kampar mwang i pane

Kampe harwathawe mandahiling i tumihang parlak muang i barat.

 

2.      I lwas lawan samudra mwang i lamuri batan lampung mwang i barus

Yakadhinyang watek bhumi malayu satanan kapwamateh anut

Len tekang nusa tanjungnagara ri kapuhas lawan ri katingan

Sampit mwang kutalingga mwang i kuta waringin sambas mwang i lawai.

 

[Pupuh 14]

 

1.      Kadangdangan i landa len ei samedang tirem tan kasah

Ri sedu baruneng ri kalka saludung ri solot pasir

Baritw i sawaku muwah ri tabalung ri tanjung kute

Lawan ri malano makapramuka ta(ng) ri tanjungpuri.

 

2.      Ikang sakahawan pahang pramuka tang hujungmedhini

Ri lengkasuka len ri saimwang i kalantan i trenggano

Nasor pakamuwar dungun ri tumasik ri sanghyang hujung

Kelang keda jere ri kanjapiniran sanusapupul.

 

3.      Sawetan ikanang tanah jawa muwah ya warnnanen

Ri balli makamukya tang badahulu mwang i lwagajah

Gurun makamuka sukun ri taliwang ri dompo sapi

Ri sanghyang api bhima seran i hutan kadalyapupul.

 

4.      Muwah tang i gurun sanusa mangaran ri lombok mirah

Lawan tikang i saksakadi nikalun kahajyan kabeh

Muwah tanah i bantayan pramuka bantayan len luwuk

Tekeng udamakatrayadhi nikanang sanusapupul.

 

5.      Ikang sakasanusanusa makasar butun banggawi

Kunir ggaliyao mwang i salaya sumba solot muar

Muwah tikang i wandan ambwan athawa maloko wwanin

Ri seran i timur makadi ning angeka nusatutur.

 

[Pupuh 15]

 

1.      Nahan lwir ning desantara kacaya de sri narapati

Tuhun tang syangkayodhyapura kimutang dharmanagari

Marutma mwang ring rajapura nguniweh singhanagari

Ri campa kambojanyati yawana miteka satata.

 

2.      Kunang tekang bhumi madhura tanani lwir para puri

Ri denyan tunggal mwang yawadharani rakwekana dangu

Samudrananggung bhumi keta sakakalanya karengo

Tewekny dadyapantara sasiki tatwanya adoh.

 

3.      Huwus rabdha ng dwipantara sumiwi ri sri narapati

Padasthity awwat pahudhama wijil angken pratimasa

Sake kotsahan sang prabhu ri sakahaywanya n iniwo

Bhujangga mwang mantrinutus umahalotpatti satata.

 

 

[Pupuh 16]

 

1.      Krama nika sang bhujangga n umareng digantara dangu

Hinilahilan awakaryya jagadona tanawang alaha

Wenang ika yan pakon nrpati sing parana ta kunang

Magehakenang siwagama phalanya tanpanasara.

 

2.      Kunang ika sang bhujangga sugatabrateki karengo

Apituwin ajna hajyatana sing saparana nika

Hinilahila sakulwan ikanang tanah jawa kabeh

Taya ring usana soddha mara rakwa sambhawa tunut.

 

3.      Tuhan ikanang digantara sawetan ing yawadhara

I gurun i bali mukya kawenang parana nika

Samaya nirang mahamuni bharada rakwa ta mapageh

Lawan ika sang munindra kuturan prakasa kareno.

 

4.      Karana ni sang bhujangga tinitah ri lakwa rasika

Ikang inutus mangulwan angawetan akrama huwus

Saji saji ring lumakwaken i sajna sang narapati

Sawiku sada yan angujar aweh resep ing umulat.

 

5.      Irika tang anyabhumi sakahemban ing yawapuri

Amatehi sajna sang nrpati kapwa satya ring ulah

Pituwi sing  ajna langghana dinon wisirnna sahana

Tekap ikanang watek jaladhimantri aneka suyasa.

 

[Pupuh 17]

 

1.      Sampun rabdha pageh ny adeg nrpati ri yawadharani jayeng digantara

Ngkana sriphalatiktanagara siran siniwi mulahaken jagaddhita

Kirnnekang yasa kirti dharmma ginawe niran n anukani buddhi ning para

Mantri wipra bhujangga sang sama wineh wibhawa tumut akirti ring jagat.

 

2.      Gong ning wiryya wibhuti kagraha tekap nrpati tuhutuhuttama prabhu

Lila nora kasangsayan ira n  anamtami suka sakaharsa ning manah

Kanya sing rahajong ri janggala lawan ri kadiri pinilih sasambhawa

Astam tan kahanang sakeng parapurasing areja winawe dalem puri.

 

3.      Salwa ning yawabhumi tulya nagari sasiki ri pangadeg naradhipa

Mewwiwu ng jana desa tulya kuwu ning bala mangideri kanta ning puri

Salwir ning paranusa tulya nika thaniwisaya pinahasukenaris

Lwir ndyana tikang wanadri sahananya jinajah ira tanpanangsaya.

 

4.      Baryyan masa ri sampun ing sisirakala sira mahasahas macangkrama

Wwanten thanyangaran ri sima kidul i jalagiri mangawetan  ing pura

Ramyapan papunagyan ing jagat i kala ning sawung ika mogha tanpegat

Mwang wewe pikatan ri candi lima lot paraparan ira tusta lalana.

 

5.      Yan tan mangka mareng phalah marek i jong hyang acalapati bhakti sadara

Pantes yan panulus dateng ri balitas mwang i jimur i salahrit alengong

Mukya ng polaman ing dahe kuwu ri lingga mara bangun ika lanenusi

Yan ring janggala lot sabha nrpati ring surabhaya manulus mare buwun.

 

6.      Ring sakaksatisuryya sang prabhu mahas ri pajang iniring ing sanagara

Ring sakangganaryyama sira mare lasem shawan i tira ning pasir

Ri dwaradripanendu panglengeng ireng jaladhi kidul atut wanalaris

Ngkaneg lodaya len teto ri sidemen jinajah ira langonya yenitung.

 

7.      Ndan ring saka sasangkanagarai bhadrapadamasa ri tambwang ing wulan

Sang sri raja sanagaran mahassahas ri lumajang angitung sakendriyan

Sakweh sri yawaraja sapriya muwah tumuti haji sabhrtya wahana

Mantri tanda sa wilwatikta nguniweh wiku haji kawiraja mangdulur.

 

8.      Ngkan teking maparab prapanca tumut anglaeng angiringi jeng nareswara

Tan len sang kawi putra sang kawi samenaka dinulur ananmateng mango

Dhramadhyaksa kasogatan sira tekap narapati sumilih ri sang yayah

Sakweh sang wiku boddha mangjuru padangatuturaken ulah nireng dangu.

 

9.      Ndan tingkah rakawi n marek ri haji duk rarai atutur asewa tan salah

Pinrihnye hati rakwa milwa sapara narapati n amalar kasanmata

Nghing tapwan wruh apetlango pisan ingun tetesa maminta gita ring karas

Na hetunya kawarnna desa sakamarggangaran ika irinci tut hawan.

 

10.  Tambe ning kahawan winarnna ri japan kuti kuti hana candi sak rebah

Wetan tang tebu pandawadri daluwang babala muwah i kanci tan madoh

Len tekang kuti ratnapangkaja muwah kuti haji kuti pangkajadulur

Panjrak mandala len ri pongging i jingan kuwu hanar i samipa ning hawan.

 

11.  Prapteng dharmma ring pancasara tumuluy dateng i kapulungan sira megil

Ndan lampah rakawi n lumaryamegil ing waru ri hering i tirtha tan madoh

Angganggehnya tekap bhatara kuti ring suraya pageh mara cinarocaken

Nghing rakwan kaselang turung mulih amogha matutur atisambhameng mango.

 

[Pupuh 18]

 

1.      Ryyangkat sri natha sangkeng kapulungan ikanang rajabhrtyangiringsok

Salwa ning raja marggaparimita hibekan sya danomwat matambak

Wwang ning wwang peka ning peka teka saha padati harep mwang ri wuntat

Dudwang wadwadarat she girimisen amedep mwang gajaswadi kirnna.

 

2.      Nistyayasangkya tang syandana mapawilangen dene cihnanya bheda

Tekwan  lampah nikapanta tulis ika dudu ring samantri samantri

Rakryan sang mantrimukyapatih i majapahit sang pranaleng kadatwan

Pinten mawan sata syandana pulupuluhan teki cihnanya neke.

 

3.      Sang sri natheng pajang kweh ni ratha nira padacihna ning diwasasri

Ndan sri natheng lasem sok ratha matulis nandaka sweta sobha

Sang sri natheng dahacihna sadahakusuma syandanabhra tulis mas

Mukyang sang sri jiwanendrasakata samasamacihna lobhang lewih sok.

 

4.      Ndan sang sri tiktawilwa prabhu sakata nirasangkya cihnanya wilwa

Gringsing lebhong lewih laka pada tinulis ing mas kajangnyan rinengga

Salwir ning punggawamwat bini haji nguniweh iswari sri sudewi

Sakweh ning pekabharyya sakata nika sinang pang harep ning sapanta.

 

5.      Munggwing wuntat ratha sri nrpati rinacana swarnna ratna pradipta

Anyat lwirnyatawing jampana sagala mawalwahulap songnya lumra

Kirnneng wadwangiring janggala kadiri sedah panglarang sok marampek

Astam tekang bhayangkari amawamawa dudung bhrtya munggwing gajaswa.

 

6.      Ndah prapteng pancuran mungkur atiki lari ning syandan enjing mararyyan

Lampah ning kawi animpang sumeper i sawungan manglawad wandhuwarggha

Lingsir ning suryya angkat marengi ri haliwat sri narendran lumampah

Tut marggamurwwa sighran dateng i watu kiken ring matanjung mararyyan.

 

7.      Desasimpar kkabodhan kaparek i tepi ning margga kaywanya poryyang

Pratyekanya galanggang muwah ikang I badung tan madoh mwang barungbung

Tankaryyanger mmanik towi kawisaya ri yanatraya nggehnya menget

Sang dharmadhyaksa sighran sinegehan ika ring bhojanapana tusta.

 

8.      Sampun prapta kulur mwang batang i gangan asem teki lampah narendra

Tistis hyang suryya pinten ghatita pitu sirem kamukan sanghub awra

Akandhaware tengahning harabara dinunung sri narendra kamantyan

Praptang wyapara sampun panadah  ira madum sthana teking wwang akweh.

 

[Pupuh 19]

 

1.      Enjing ryy angkat irang narendra dateng anghinep i bhaya lango tigang kulem

Sah sangkeri katang kedu dawa rame janapada kahalintangan huwus

Ring lampes ri times muwah kuti ri pogara kahenu lebuh ni kaget

Mwang ring mandala hambulu traya teka dadap adulur ikang rathalaris.

 

2.      Wwanten dharma kasogatan prakasite madakaripura kastaweng lango

Simanugraha bhupati sang apatih gajamada racananya nutama

Yekanung dinunung nareswara pasanggrahan ira pinened rinupaka

Andondok mahawan rikang trasungai andyusi capahan atirthasewana.

 

[Pupuh 20]

 

1.      Prapteng desa kasogatan sahana mawwat bhakta pane haji

Pratyakanya gapuk padewisisa yeng isanabajra pageh

Ganten poh capahan kalampitan ing lumbang len kuran we petang

Mwwang pancarprasamangsa ning kuti mungguh kapwa tasrang mamarek.

 

2.      Milwang desa ri tunggilis pabayeman rowangnya nekapupul

Rehnyangse kuti ratnapangkaja hane carccan kabhuktyapateh

Nahan ta pabalas kasogatan anangsanggehnya kuwwapageh

Bhuktinyanpinakaryya kawwalu huwus tingkahnya nguni dangu.

 

[Pupuh 21]

 

1.      Byatitenjing mangkat caritan ikanang desa kahawan

Ri lopandak ranwakuning i balerah baru bare

Dawohan lawan kabayeman i telpak ri baremi

Sapang kapraptan mwang kasaduran anujwing pawijungan.

 

2.      Jurang bobo runting mwang  i pasawahan teki kahenu

Muwah prapteng jaladhipa talapika mwang ri padali

Ring aranon lawan pangalan i payaman len tepasana

Tekeng rembang prapte kamirahan i pinggir ning udadhi.

 

[Pupuh 22]

 

1.      I dampar i patunjungan nrpati lalana mahawan i tira ning pasir

Amurwwa henu tut heni ratarata nika magenetimbah  ing ratha

Araryyan i samipa ning  talaga she sarasija tarate padasekar

Jenek mihat i posik ing makara ring wwayahening i dalemnya waspada.

 

2.      Ndatan wicaritan kalangwan ikanang ranu masurawayan lawan tasik

Riyangkat ira san datang ri wedi ri guntur asenet i samipa ning hawan

Kasogatan i bajrakangsa ri taladhwaja  telas apageh cinarocaken

Dulurnya ri patunjungan kaselang i bala turung umulih mareng kuti.

 

3.      Yateka hinalintangan muwah amurwwa matut alas i tira ning pasir

Araryyan irikang palumbwan aburu ksana lumaris i lingsir ing  rawi

Bhawisya hinalintang ing lwahi rabut lawang anuju surud ningampuhan

Lurah ri balater linakwan ira lalana mamegil i tira ning pasir.

 

4.      Ring enjing ahawan kunir basini saksana dateng i sadeng siramegil

Pirang wengi kuneng lawas nirajenok mamenameng i sarampwan anglengor

Ri sah niri wawang teke kuta bacok narapati nawilasa ring pasir

Jenek lumihat ing karang kinasut ing ryyak asirasirat anghirip jawuh.

 

5.      Tuhun rakawi tan mare kuta bacok dumadak anuti simpang ing hawan

Anguttara sake sadeng mahawan ing balung anuju ri tumbu len habet

Mwah ri galagah ri tanpahing anganty amegil i renes apty anangkila

Amogha kapapag narendra mahawan jayakrta ri wanagriya laris.

 

[Pupuh 23]

 

1.      Ri dhoni bentong paruhan lawan bacek

Pakis haji mwang padangan secang

Ri jatigumlar kkhahawan silabhango

Anguttareng dewa rame take dukun.

 

2.      Muwah lumampah dateng ing pakambangan

Rika megil sang prabhu saksananlaku

Dateng ta ngsil wwitara ing lurah daya

Linakwan aglis dateng ing jurang dalem.

 

3.      Ikang hawan dug mangalor saking tasik

Ri sandengandeng nika durgga marupok

Lumud jawuh sangka nikan padaleyo

Aneka tang syandana sak silih pagut.

 

[Pupuh 24]

 

1.      Tuhun maglis dug ring palayangan awarnnalayang adoh

Ri bangkong kongang tang warana mamegil sigra lumaris

Padamrih prapta ring sarana tikanang wwang masarana

Waneh sighra prapteng surabhasa rabad ning wwang angiring.

 

2.      Sirep ning ngwai mandalangalang i tekanyong alang alang

Ri sandhyandegnyandel sapi nika waneh puh besur angel

Bhawisyang yananguttara turayan ang desa kahawan

Padatryangkat nyagyataki taki teka ri patukangan.

 

[Pupuh 25]

 

1.      Tanngeh yan caritan pratingkah ikanang awabhrtya mantry adulur

Warnnan teki datang nire patukangan sang sri narendrapupul

Nggkaneng sagaratira kulwan ikanang talakrpal warata

Lor parnnahnya sakeng pakuwwan irikanggwan sri narendramegil.

 

2.      Sakweh sang paramantry amancanagaromunggwing pakuwwan kabeh

Mwang sang dhyaksa pasangguhan rasika sang wangsadhirajomarek

Tansah sang hupapatty anindita dang acaryyottaranopama

Saiwapanji mapanji santara widagdheng agama wruh kawi.

 

[Pupuh 26]

 

1.      Ndan mukyadhipating pakuwwan apageh sengngaryya suradhikara

Sakweh ning jajahan saka patukangan sampun datang tan masowe

Kapwasrang mahaturhatur pada sinangan wastra tuddhinya tusta

Tustan yang dani tusta ri nrpati santustan jenek ring pakuwwan.

 

2.      Wwanten rupaka laryya laryyan anengah sangke hujung ning samudra

Wesmaneka kikis tinep natar ikalwapinda nusa n sakeng doh

Margganyeki linantaran leyep awarnnengguh katon de nikang ryyak

Kirtti sang aryya towi pasenahe  praptye sang sri narendra.

 

[Pupuh 27]

 

1.      Ngka sri natha maranglipur huyang i tiksna ning dinakara

Saksat dewata dewati n saha kasih niratikatikan

Wwang ring jro sawang apsari n wahu sakeng wihaya madulur

Mukta ng klesa hidep nikang mulat awahna tibra kawengan.

 

2.      Tan tunggal tikanang wilasa ginawe narendrakasukan

Sing wastwasunga tustacitta ri kanang pradesa winangun

Baryyan karaketan sramasrama  mawak janger ning umalat

Singgih dewa mangindarat juga  siran lumanglang i jagat.

 

[Pupuh 28]

 

1.      Pira teki lawas nira ri patukangan

Paramantri ri bali ri madura datang

Ri balumbung andelan ika karuhun

Sa  awaksiti  wetan umarek apupul.

 

2.      Pada bhaktya ahatur pada masirasiran

Bawi mesa kebo sapi hayam asu sok

Saha wastra pinundut adulur asusun

Manah ing mulat adbhuta kadi tan i rat.

 

3.      Saka tembay ing enjang atiki caritan

Naranatha siradadar i bala kabeh

Milu salwir ikang para kawi sinungan

Pada tusta tikang paramajana ngalam.

 

[Pupuh 29]

 

1.      Ndan sang kawy aparab prapanca juga soka tanari siwuhan

De sang kawy upapatti sogata mapanji krtayasa pejah

Mitranggeh rasike kalangwan asahing dulur atakitaki

Lagy amulyani kirttipustaka tinumbas inapi  tinengot.

 

2.      Citangkwi rasika’n katemwa warasangatera mahasahas

Nyama wruh ri parana ing mahas akirtty atilara kakawin

Nguni’n matya jemah muwah sisip iking lara pinahalalu

Mati pwa dateng inghulun lewes aweh sekel anahasa.

 

3.      Nahan karana ning wawang sah umareng keta milu rumuhun

Tal tunggal, halalang dawa ri pocaran kahawan i pungatan

Prapteng toya-rungun walanding anujw i tarapas amegil

Enjing laryy ahawan lemah bang irikang ksana dateng i keta.

 

[Pupuh 30]

 

1.      Rintar sang sri narapati n-angulwan muwah teki warnnan

Sighra prapteng keta pilipilih panca ratri npanganti

Swecchamarnna ng jalanidhi n-amanggih muwah laryyalaryyan

Ndatan dady alupa ring anukane parapan ginong twas.

 

2.      Kweh ning mantri kota padamarek ayyam ajna sang aryya

Wirapranadhi nika milu  sa-shiwa-boddhopapatti

Mwang sakweh ning jajahan angiring sek datang tan binundang

Kapwawwat bhojana sahana tustan sinungan suwastra.

 

[Pupuh 31]

 

1.      Ri sah nira sakeng keta meweh ikang awabhrtyangiring

Banu-hning ika kahawan weki datang ri sampora sok

Muwah ri daleman teke waharu ring sinor hop glisan

Gebang krpigelam teke kalayu rajakaryyeniwo.

 

2.      Ikang kalayu dharmmasima sugatapratistapageh

Mahottama sujanma wandhu haji sang dhinarmmang dangu

Nimita ni pakaryya haji dharmmakaryyadhika

Prasiddha mamegat sigi kawekas i sudharmmenulah.

 

3.      Ikang widhiwidhana sakrama telas genep sangkepan

Makady ang upabhoga bhojana halep nikanopama

Amatyagana samya sanggha sagiri datang ring sabha

Medangga padahatri mageligelan mahingan dina.

 

4.      Narendra ri huwus ni karyya nira sastra ni twas ginong

Asing sakaparek pradesa pinaran dhanondok dateng

Pirang wengi lawas nirerika pararttha manggong suka

Surupa binihajy ulih nira wisesa kanyanulus.

 

5.      Ri sah nira sakeng kalaw i kutugan kahenw alaria

Ri kebwan-ageng aglis enggal amegil ri kembang-rawi

Sudharmma sugatapratista racananya sobhahalep

Anugraha naresware sang apatih pu naladhika.

 

6.      Haturnatur i sang patih lewu halep nikanindita

Byatita panadah narendra rikanang prabhatocapen

Umangkat ahawan ri halses i barurang ri patunjungan

Anunten i patentenan tarub i lesan asrw alaris.

 

 

[Pupuh 32]

 

1.      Sighran dateng i pajarakan patang dina lawas narapati n-amegil

Ngkaneng harahara kidul ing sudharmma sugatasana makuwukuwu

Mantri wiku haji karuhun sang aryya sujanottama pareng umarek

Kapwangaturaken upabhoga bhojana wineh dhana pada kasukan.

 

2.      Rintar narapati n-alaris wanasrama ri sagara keta ng usiren

Sengkan hawan ira mangidul pakalyang ri buluh kata kahaliwatan

Mwang mandala hikang i gede samantara ri sagara keta kadunung

Sobhabhinawa ri tengah ing wanadri racananya n-amulangunaken.

 

3.      Nda tan pijer umarek i jong narendra rakawi n-jenek angapi lango

Langlang lalita lali  laleda dulwi lala meneh akalis ing ulah

Tamtam  tan atutur i tutur nika n-tut i tata ni sang atakitaki

Janjan jumalajah i jajar ni banjar ikanang yasa cinaracara.

 

4.      Prapteng pathani ri tepi ning tepas ikatepung atetel atob

Secchamacamaca cacahanya n-angracana bhasa racana kakawin

Kweh ning yasa pada dinuman wilapa dadakan saha parab inamer

Pancaksara ri wekasan ing pralapa sinamarsamar awetu lango.

 

5.      Bwat ranten atulis atulis katha patiga watw inasaban aruhur

Jrah nagakusuma kasumanya ring natar i tira nika pinarigi

Andung karawira kayumas manur caracaranya saha kayu puring

Mwang nyu gading akuning ahandep awwah i padunya n-amuhara lango.

 

6.      Tanngeh yadi caritan ikang wanasrama langonya n-asemu siluman

Tingkah nika ri dalem heng mahogra tekap  ing yasa pada hineduk

Mwang kweh parakaki nguniweh parondang atuhararay ahayu waged

Mokta ng mala kalusa mihat bangun wihikan ing siwapada sakala.

 

[Pupuh 33]

 

1.      Nrpati mahas ring asrama wawang sinegehsegehan

Tekap ira sang maharsi mapalinggih asabda resep

Asung upabhoga salwir I bhinukti nire patapan

Nrpati males yathakrama ring arttha lewes kasukan.

 

2.      Pangucapucap niran gumunita rasa ning kawikun

Pada mawarah ri resi ni manah nira tan tinengot

Wekasan acangkramalengeng asing kalangwan pinaran

Muhara ri tusta sang tapa tapi n-lumihat kawengan.

 

3.      Ri huwus iranglengong majar i seng sutapan muliha

Ri wijil iralaris helahela lumihat kawekas

Tapitapi sing raranwam ahajong pada karyy angarang

Smara manurun mabancana sireki hidepnya n-akung.

 

[Pupuh 34]

 

1.      Ryy antuk narendra kari sukseka ng asramoruk

Pringnyakusangeh abalut ri matalupa ken

Anggong tangis sereh ikayam alas nikajrit

Angluh tus ing tal angaleh syung ikanpasambat.

 

2.      Asret lari nrepati n-aglis apan tumampa

Kweh ning yasareja kamargga telas kalawan

Sighrandatang sira ring aryya saratry anganti

Enjing manguttara bhawisya datang ri gending.

 

3.      Sang mantry amancanagari karuhun sang aryya

Singhadhikara nguniweh para saiwa boddha

Kapwahatur ttadah anindita sopacara

Mas wastra nama pamales nrpati n-suka twas.

 

4.      Arddhalawas nrpati tansah anganti masa

Solah nireng sakuwukuww atika ng linolyan

Ryy angkat niranhawan i lohgaway ing sumanding

Borang bangor baremi tut henu bany angulwan.

 

 

 

 

[Pupuh 35]

 

1.      Tuhun i dateng nire pasuruhan menimpang angidul ri kapanangan

Anuluy atut damargga madulur tikang ratha dateng ring andoh wawang

Muwah i kedung peluk lawan i hambal antya nikang pradesanitung

Jhatiti ri singhasari-pura rajadharmma dinunung narendramegil.

 

2.      Kunang ika sang prapanca kari kulwan ing pasuruhan pijer lalana

Kuti mangaran rin darbaru ri bhuh pradesa nikanang pradesa hujung

Yata pinaran tinakwanaken angsa punpunan ika ri sang sthapaka

Likita tinonaken rasika suprasasti  winacamangun waspada.

 

3.      Ikang i lepit yathaswa salebak wukirnya wisayangsa sang hyang kuti

Satengah i markaman sawah i balunghura sawah muwah ring hujung

Rasa nikang prasasti magawe hyun ing kawi madoha sangkeng pura

Ri taya nikang purakrta teher daridra musira ng kutin darbaru.

 

4.      Karana ning asru mangkat huwus nira mpu masegeh bhawisyalaris

Maluy i kasekawan dateng i singhasari matutur manangkil marek

Nrpati huwus mamuspa ri dalem sudharmma sakatusta ning twas ginong

Hanan i kedung biru ri kasurangganan mwang i bureng langonyenitung.

 

[Pupuh 36]

 

1.      Krama subhakala sah nira ri singhasari mangidul mare kagenengan

Humaturaken kabhaktin i bhatara dharmma sawatekwatek nira tumut

Dhana paribhoga bhojana dulur ni puspa nira sopacara mahelep

Saha wasanawawan watang apangruhun pada mangarjjita ng wwang umulat.

 

2.      Ri huwus i ranpangarccana mijil ri heng pinupul ing balakrama marek

Para wiku saiwa sogata sang aryya naligih inaring nireki tan adoh

Awicari tan sedeng ni panadah narendra tumekahi sesta ri hati

Bala haji sing sasambhawa wineh suwastra magawe resep ning umulat.

 

[Pupuh 37]

 

1.      Warnnan pratingkah ikanang sudharmma racananya tanpasiringan

Dwaratisobhita samekale yawa ruhur nikaparamita

Ri jro natar nika tinumpatumpa tinatang yasarja ri tepi

Sok sarwwapuspa bakularjja nahi kusumady warnna siluman.

 

2.      Prasada munggw i tengah asmu kadbhuta halep nikahyang aruhur

Lwir meruparwwata siwapratista siwawimba munggu ri dalem

Sotan bhatara girinathaputra pinekesti dewa sakala

Anggeh nirantuhatuhanarendra kinabhaktyan ing sabhuwana.

 

3.      Wwanten keteka kidul ing sudharmma ri dalem pratista katilar

Nang bapra gopura paduruhur kkasugatan batang nika dangu

Ri jronya dangka turunan baturnya kari purwwa kulwan anana

Nghing purnna sanggar ika len pamujan atitah batabang aruhur.

 

4.      Nang lor batur ni turunanya sesani lemahnya sampun arata

Jrah nagapuspa tanemanya len tangi natarnya masmy asalaga

Heng ning gupunten  ikanang pabhaktan aruhur lemahnya katilar

Alwa natarnya dukten henunya sukuten hibak lumulumut.

 

5.      Lwir stry agring angranuhi ragi molem ikanang cawinten awenes

Morawra camara nika kusut mapusek oli lot kapawanan

Nyu danta lagi luluren tapas nika pucangnya tan kram asamun

Moghalume sah i tapihnya tang sara gading taharyy akusikan.

 

6.      Angras twas ing mihati reh nikan taya makosa dhanya kawenang

Nghing sri hayam wuruk inanti hetwa ni  tuwuhnya jiwana muwah

Apan siramupusi kottaman tama ring uttamanukani rat

Masih ring atpada lanawelas ing manemu duhka dewa salaka.

 

7.      Warnnan muwah lari nareswarenjing umareng suddharmma ri kidal

Sampun manamya ri bhatara lingsir anuluy dateng ri jajaghu

Sampun muwah marek i sang hyang arcca jinawimba sonten amegil

Enjing maluy musir i singhasari tan aleh mararyyan i bureng.

 

[Pupuh 38]

 

1.      Ramya nika(ng) bureng talaga mumbul ahening abiru

Candi sila minakala ri madhya nika rinacana

Sok yasa munggwi pinggir ika len kusuma caracara

Lot paran ing macangkrama lanangjeneki ring umara.

 

2.      Tan wuwusen lango nika tuhun narapati caritan

Tistis ing arkka mangkat ahawan tegategal aruhur

Ramya dukut nikatetel atandes akiris ahijo

Lwanya sasagaranak angalun jurang ika dinelo.

 

3.      Sri-naranatha lalana yaya ratha nira malaris

Prapti ri singhasari tumame wegilan ira huwus

Ndan rakawi ywa mampir sirang sugatamuniwara

Sthapaka ring sudharmma tuwi gotrasawala dunungen.

 

4.      Wrddha halintang i sasi sahasra tuwuh ira huwus

Satya susila satkula kadang haji suyasa

Purnna tameng kriya mara tan angkadhara panagara

Kyatiri mopungku huttama kasatpadan ira satirum.

 

5.      Sighra katanggama ywa si walat nira wawang asegeh

Du, laki, bhagya kawi sang amrih amareki haji

Sang wenang asrayan masiha ring kadang amelas arep

Masku kading pangipyan aparan ta pasegeha temun.

 

6.      Ndon rakawi n’parahyun atana krama ni tuhatuha

Sri naranatha sang pada dhinarmma satata pinarak

Mukya bhatara ring kegenengan karuhuna wuwusen

Purwwakatha niran giripatiswarasuta caritan.

 

[Pupuh 39]

 

1.      Tuhun paduka mpungkwi mungguh sirojar

Udu diwya, takwan rakawy angene twas

Mahotsaha singgih kawi wreddhabuddhi

Purih ning kasastrajnan angde stuting rat.

 

2.      Nda sangtabya teki nghulun majarosen

Masucya way ing saptatirtthe awacitta

Namas te girindraya sambah ri sang hyang

Nda tan dadya kotpata teki mpasabda.

 

3.      Ksamatah manah sang kawindran rumengo

Ikang wwang rengo sugyan akweha mithya

Ndan anggegwane jana sang wrddha teka

Pilih nyuna sugyadhika tan calana.

 

[Pupuh 40]

 

1.      Nguni sakabdhidesendu hana sira mahanatha yuddhaikawira

Saksat dewatmakayonija tanaya tekap sri-girindra prakasa

Kapwares bhakti sakweh parajana sumiwi jong niratwang tumungkul

Sri-ranggah rajasa kyati ngaran ira jayeng satru suratidaksa.

 

2.      Desagong wetan ing parbwata kawi penuh ing sarrrabhogatiramya

Kuww anggehnyan kamantryan mangaran i kutarajenadeh wwang nikabap

Yeki nggwan sri girindratmaja n-umulahaken dharma manggong kasuran

Tusta ning sadhu nasta ning ahita ya ginong sthitya ning rat subhakti.

 

3.      Ri sakabdhikrtasangkara sira tumeka sri narendreng kadinten

Sang wiranindita sri-krtajaya nipuneng sastra tatwopadesa

Sighralah gong bhayamrih malajeng anusup pajaran parswa sunya

Sakweh ning bhrtya mukyang parapajurit asing kari ring rajya sirnna.

 

4.      Ryy alah sang sri-narendreng kadiri girigirin tang sabhumi jawares

Praptanembah pada wwat sahanahana wijil ning swadesanpasewa

Tunggal tang janggala mwang kadiri samasamangekanathatisakta

Ngkan tembe ning dapur mwang kuwu juru tumameng samya mangde sukeng rat.

 

5.      Nangkin wrddhy amweh tang prabhawa wibhawa ring sri-girindratmasunu

Enak tandel nikang yawadharani sumiwi jong niran chatra ning rat

Ri sakasyabdhirudra krama kalahan iran mantuk ing swarggaloka

Kyating rat sang dhinarmma dwata ri kagenengan saiwa-bodheng usana.

 

 

[Pupuh 41]

 

1.      Bhatara sang anusanatha weka de bhatara sumilih wisesa siniwi

Lawas nira n-amukti ring rat apageh tikang sa yawabhumi bhakti matutur

Sakabda tilakadri-sambhu kalahan bhatara mulih ing girindrabhawana

Sireki winangun pradipa siwabimba sobhita rikang sudharmm ri kidal.

 

2.      Bhatara wisnuwarddhana kateka putra nira sang gumanti siniwi

Bhatara narasingha rowang ira tulya madhawa sahagrajamagehi rat

Siranghilangaken duratmaka manama linggapati mati sirnna sahana

Ares sahana ning parangmuka ri jong nireki tuhu dewamurtti sakala.

 

3.      I saka rasaparwwatenduma bhatara wisnu ngabhiseka sang suta siwin

Samasta parasamya ring kadiri janggalomarek amuspa ring purasabha

Narendra krtanagarekang abhisekanama ri siran huwus prakasita

Pradesa kutaraja mangkin atisobhitangaran i singhasarinagara.

 

4.      Sakabda kana wawaniksiti bhatara wisnu mulih ing suralaya pejah

Dhinarmma ta sire waleri siwabimba len sugatawimba mungw i jagahu

Samantara muwah bhatara narasinghamurti sira mantuk ing surapada

Hanar sira dhinarmma de haji ri wengker uttama-siwarcca munggwi kumitir.

 

5.      Kathakena muwah narendra krtanagaranghilangaken katungka kujana

Manama cayaraja sirnna rikana sakabda bhujagosasiksaya pejah

Nagasyabhawa saka sang prabhu kumon dunoma rikanang tanah ri malayu

Lewes mara bhayanya sangka rika dewamurti nira nguni kalaha nika.

 

[Pupuh 42]

 

1.      Sakabda yamasunyasuryya diwasa nrpati muwah amati durjjana

Ikang mahisa rangkah atyaya katungka nika pinaleh ing sanagara

Ring anggawiyatarkka saka sira motusan kana ri bali curnnitan

Ndatandwa kawenang ratunya kahanang  teka marek i narendra sakrama.

 

2.      Samangkana tikang digantara padangabhaya marek i jong nareswara

Ikang sakahawat pahang sakahawat malayu pada manungkul adara

Muwah sakahawat gurun sakahawat bakulapura mangasrayomarek

Ndatan lingen i sunda len madhura pan satanah i yawa bhakti tansalah.

 

3.      Tuhun nrpati tan pramada luput ing mada makin atiya na ring naya

Apan tetes i keweh ing bhuwanaraksana gawayen i kala ning kali

Nimitta nira n-angregep samaya len brata mapageha paksa sogata

Tumirwa sang atitaraja ring usana magehakena wrddhi ning jagat.

 

[Pupuh 43]

 

1.      Ling ning sastra narendra pandawa rika dwapara nguni prabhu

Gogendutri lawan sakabda diwasa ny antuk nireng swahpada

Ndah santuk nira tembay ing kali teka’ng rat murkka harohara

Anghing sang hyang sadabhijnadharaka rumaksa’ng loka dewa prabhu.

 

2.      Nahan hetu narendra bhakti ri pada sri-sakyasinghastiti

Yatnanggegwani pancasila krtasangskarabhisekakrama

Lumra nama jinabhiseka nira sang sri-jnanabajreswara

Tarkka-wyakaranadi sastra ng-anji srinatha wijnanulus.

 

3.      Ndan ri wreddhi nireki matra rumegep sarwwakriyadhyatmika

Mukya’ng tantra subhuti rakwa tinengot kempen rasanye hati

Puja yoga samadhi pinrih ira’n amrih sthitya ning rat kabeh

Astam tang ganasastra nitya madulur ddaneniwo ring praja.

 

4.      Tan wwanten karengo kadi nrepati sakweh sangng atitaprabhu

Purnneng sadguna sastrawit nipuna ring tatwopadesagama

Dharmestapageh ing jinabrata mahotsaheng prayogakriya

Nahan hetu ni tus nira padaikacchatra dwaprabhu.

 

5.      Ring sakabdhijanaryyama nrepati mantuk ring jinendralaya

Sangke wruh nira ring kriyantara lawan sarwwopadesadika

Sang mokten siwabuddhaloka kalahan sri-natha  ning sarat

Ringke sthana niran dhinarmma siwabuddharcca halepnyottama.

 

6.      Lawan ring sagala pratista jinawimbatyanta ring sobhita

Tekwann arddhanareswari mwang ika sang sri-bajradewwy apupul

Sang rowang nira wrddhi ring bhuwana tunggal ring kriya mwang brata

Hyang wairocana locana lwir iran-ekarcca prakaseng praja.

 

[Pupuh 44]

 

1.      Tatkala sri-narendra krtanagara mulih ring buddhabhawana

Trasa’ng rat duhka harohara kadi maluya rehnyan kaliyuga

Wwanten samantaraja prakasita jayakatwang nama kuhaka

Ngkaneng bhumi kadiry apti smiliha wisesamrih kira-kira.

 

2.      Nguni lungha nira sri-krtajaya rikanang sakabdhimanusa

Ajna sri-parwwatadhindrasuta jayasabdha ng anggantyana siwin

Ring sakastaikana sastrajaya muwah umungwing bhumi kadiri

Ring saka trini san sangkara haji jayakatwang natha wekasan.

 

3.      Sakweh ning natha bhakti weka ni weka bhataradrindratanaya

Astam ri sri-narendra krtanagara tekeng nusantara manut

Mangke pwe lina sang bhupati haji jayakatwang murkka wipatha

Keweh ning rat rinakseng kali niyata hayunya tan dadi lana.

 

4.      Pangdani wruh nireng sastra pangawasa ni kotsahan haji dangu

Mogha wwanten weka sri-nrpati malahaken satrw amahayu rat

Ndan mantw anggeh nira dyah wijaya panelah ing rat mastawa sira

Arddha mwang wwang tatar mamrepi haji jayakatwang bhrasta sahana.

 

[Pupuh 45]

 

1.      Ri pejah nrpa jayakatwang awa tikang jagat alilang

Masaruparawi sakabda rika nararyya sira ratu

Siniwing pura ri majhapahit anuraga jaya ripu

Tinelah nrpa krtarajasa jayawarddhana nrpati.

 

2.      Satewek nrpa krtarajasa jayawarddhana siniwi

Sa yawaksiti maluy atutur atisadara n-umarek

Pada harsaja n-umulat ri payugalan nrpati catur

Duhita nrpa krtanagara pada tulya surawadhu.

 

 

[Pupuh 46]

 

1. Ndan sang sri-parameswari tribhuwananamagrajanindita

Tansah dyah duhita prakasita mahadewy anulus ring hajong

Prajnaparami takya sang maka jayendradewy anindyang raras

Dyah gayatry anuraga wungsu pinakadi’n-rajapatning puri.

 

2. Ndan rakweki n-atemw amingtiga siran wwang sanak arddhaparo

Apan rakwa bhatara wisnu mamisan parnnah niran tan madoh

Lawan sri-narasinghamurtty aweka ri dyah lembu tal susrama

Sang wireng laga sang dhinarmma ri mireng poddhapratistapageh.

 

[Pupuh 47]

 

1. Dyah lembu tal sira maputra ri sang narendra

Na don niran resep amingtiga len suputri

Na lwir pawor ni pakuren haji saikacitta

Sajna nirajna kinabehan aweh sukeng rat.

 

2. Ring saka sapta-jana-suryya narendra warnnan

Mastwaken atmaja niran siniwing kadinten

Srindreswaribu nira wira widagdha wijna

Rajabhiseka jayanagara tanhanoli.

 

3. Ring saka ma-try-aruna lina nirang narendra

Drak pinratista jinawimba sireng puri jro

Antahpura ywa panelah nikanang sudharmma

Saiwapratista sira teki muwah ri simping.

 

[Pupuh 48]

 

1. Ndah kawekas narendra jayanagara prabhu ri tiktawilwa nagari

Mwang nrputrikanten ira mebu sang prawararajnatny anupama

Sang rwa padottameng hayu bangun rwa rati’n anoraken surawadhu

Natha ri jiwanagraja nira nrpe daha sire pamungsu siniwi.

 

2. Ring sakakala mukti-guna-paksa-rupa madhumesa ta pwa caritan

Sri jayanagara n’umangkat anghilangaken musuh ri lamajang

Bhrasta pu nambi sak sakulagotra ri pajarakan kutanya kapugut

Wrinwrin ares tikang jagat I kaprawiran ira sang narendra siniwi.

 

3. Ring sakakala windu-sara-suryya sang nrpati mantuk ing haripada

Sighra siran dhinarmma ri dalem prarcca nira wisnuwimba parama

Len ri sila petak mwang i bubat padapratima wisnumurtty anupama

Sing suka-lila tang sugatawimba sobhita n’amoghasiddhi sakala.

 

[Pupuh 49]

 

1. Tuhun ring sakabdendubana-dwi-rupa

Nrpe jiwana kyati mata narendra

Gumantirikang tiktamalura rajni

Oita sri-narendra rikang singhasari.

 

2. Paningkah nira sri-maharajapatni

Sirateki manggalya ring rat wisesa

Suta mantu len potrakan raja rajni

Sirangratwaken mwang rumakseng sakaryya.

 

3. Ring agniswari saka tang satru sirnna

Sadeng mwang ketalah dinon ing swabhrtya

Tewek ning jagad raksana bwatnya sumrah

Ri sang mantry anama madatyanta wijna.

 

4. Muwah ring sakabdesu-masaksi-nabhi

Ikang bali nathanya dussila nica

Dinon ing bala bhrasta sakweh winasa

Ares salwir ing dusta mangdoh wisata.

 

5. Dang acaryya ratnangsa na ling nirojar

Tuhujar ni sang wrddha pojar nirangres

Katon kottaman sri-narendra rikang rat

Apan dewawangsathawa dewamurtti.

 

6. Ikang wwang rumengwi katha sri-narendra

Ndatan trpti citanya membuh kabhaktin

Mawas papakarmmanya maryyangawesa

Ikang duhka rogadi mawas winasa.

 

7. Muwah paduka mpungku mopaksamojar

Iking pangrengo masku hinganya mangka

Tumamwe ri kawrddhyan ing panditatwa

Phala ning mucap kastawan sang wisesa.

 

8. Huwus ning segeh sakramarjjawangling

Rakawy amwitanoliheking swakaryya

Teka’ng ratri sonten megil ri pakuwwan

Ksamenjing manangkil ri jong narendra.

 

[Pupuh 50]

 

1. Warnna sri-nrpati mahas mareng paburwan

Mangkat sayudha saha bhrtya len rathaswa

Ngkaneng nandanawana kananatidurgga

Kaywanyadbhutatara kasa munja kirnna.

 

2. Medran tang bala balabar huwus menengko

Lawan syandana madan angrapet rangkot

Kedran tang wana wanaranya kagyat awri

Awreg paksi nika mapaksa mura kegu.

 

3. Hung ning bhrtya mawurahan matunwatunwan

Ghurnnawarnna pasurak ing tasik gumenter

Untab ny agni nika dudug ring antarala

Saksat kandawawana de hyang agni nguni.

 

4. Tonton tang marga malayu ndatan wri ratnya

Kawran wibhrama marebut harep marampak

Apan minggat abalabar kkares nikenggi

Hetunyakukud umusi tengah matimbun.

 

5. Kwehnya lwir ggawaya ri gobrajaprameya

Lwir goh ring wrsabhapurangebek prakirnna

Wok senggah gawaya lulaya salya cihna

Godheya plawaga widala gandakadi.

 

6. Satwasing sahana rikeng alas pralabdha

Kapwatut manah ika tan hana wirodha

Kadyahem pinaka jurunya tang mrgendra

Ngkane sanding ika siwa marek tan enggi.

 

[Pupuh 51]

 

1. Ksamakena patakwan inghulun i sang mrgendradhipa

Gati nrepati n-angrarah gahana toh naya  ndya ng gegen

Angantya juga matya ring pangadegan malaywa kuneng

Mwang anglagana denya tulya hayuyun dinon tan murud.

 

2. Awarnna kadi mangkanojar ikanang srgalomarek

Ikang harina krsnasara ruru cihna mojar wawang

Yan i bwat i patikta tan hana muwah nayanung gegen

Kalena saka ring malayw amalarolihang ungsiren.

 

3. Ikang gawaya serabha wresabha len taraksamuwus

Ada wipatha kong kenas tuhutuhun mrgalpadhama

Ndatar lekasa ning sudhira ng alayu mangantya kuneng

Si manglawana dharmma gegwana malar tumemwa ng hayu.

 

4. Mrgendra sumahur kalih pada wuwus ta yuktika gegem

Nda yan wruha mabhedaken sujana durjjananung delon

Yang ing kujana wahya solaha malaywa mangswa kunang

Apan wiwal angangga patyana tekapnya tanpadon.

 

5. Tuhun pwa yan i sang tripaksa resi saiwa boddha tuwi

Malaywa juga ng enakangiringane siran pandita

Kunang pwa kita yat kapanggihana tekap narendraburu

Angantya  pati kewalawwata huripta haywagigu.

 

6. Apan nrpati yogya panghanutane hurip ning dadi

Bhatara giripaty amurtti ri siran wisesaprabhu

Awas hilanga papa ning pejana de niramatyana

Lewih saka ri kotaman ing alabuh ri sang hyang ranu.

 

7. Syapeka musuha kwa ri bhuwana yanpade medhani

Tathapi ri sira tripaksa mariris ngwang andoh wawang

Pitowi haji yan ta katemwa niyataku kawwat hurip

Ndatan muwaha satwajati phala ning pejah de nira.

 

[Pupuh 52]

 

1. Kadi mojar aku pwa kita npapupul

Wekasan pareng anghada yan humarek

Bala peka sahastra kaduk maburu

Pinagut ing asrngga maloy malayu.

 

2. Tucapa mamawaswa pareng maburu

Tinujunya earaha sedeng mapupul

Kasihan karawangnya n-aneka pejah

Rinebut saha putra tatanpabisa.

 

3. Manalandangi teki karungnya maso

Sakapatilima bhinna magong maruhur

Amesah ta tutuknya mabang ri mata

Pada rodra sihung nika tulya curik.

 

4. Ikanang swa n-amanuk iniratnya pejah

Hana rantas iganya gulunya pegat

Rinebut mwah anglwangi malwang arok

Papagutnya bangun laga rodra jemur.

 

[Pupuh 53]

 

1. Tucapang aburw anut harina manjangan silihuhun

Sasiki winangswan ginayur ing gayor geyuh alon

Laku nika pan kenoru rudhira drawadres  angebek

Dudu ng asakit kene pada pinada mawyat aninga.

 

2. Apulih ikang balatri saha tumbak akral angusi

Atunah ikang kenas kimuta manjangan lwang ika bab

Apulih ikang wisana gawayadi satwa magalak

Bubar alayu bala nrepati kagyat alwang iniwud.

 

3. Hana mangusir jurang suket alindungan tahen agong

Dudu ng umanek mareng pang arebut ruhur kaburayut

Kasihan ikang musir kkayu rumangkarangka lumaluy

Kaparepekan wetisnya winisana kagyat akidat.

 

4. Ksana paramantry aneka saha wahanasrang apulih

Amatang anula mangduk anuligy amandem anujah

Karana nikang wisani malayu grbegnya gumepuh

Tinut inusinuya lwang ika kirnna kirnna rinebut.

 

5. Wiku haji saiwa boddha hana milw anumbak aburu

Gineluran ing taraksa malajong tinut mangudiding

Lali ring upakriya nggan ika tan susila ta kuneng

Tumut angiwo kawahyan alupan huwus krtawara.

 

[Pupuh 54]

 

1. Warnnan sri naranatha sampun umanek rin syandananindita

Sobhatyanta ruhurnya pathya tikanang sapy amatek nirbhaya

Mungsi madhya nikang wanantara manut burwan sing angde takut

Hetunyalaradan megat bala parangdoh tang sawanyalayu.

 

2. Karry ang sukara krsnasara ruru cihnadinya manggong bhaya

Tandang sri-nrpati n-mawahana turangganut riy atry alayu

Mantri tanda bhujangga kapwa sang umunggw ingng aswa milw aburu

Bhrasta ng sawa dinuk tinumbak iniras kinris pejah tangagap.

 

3. Arddhalwa marata lemah tuwin alas rengkod ri sornyapadang

Hetunya ng harinatidurbbala tinut saglisnya de ning kuda

Tustambek nrpati n-pararyyan anadah mantri bhujanggomarek

Majar solah iranpakolih irikang solih nirangde guyu.

 

[Pupuh 55]

 

1. Awicaritan gati nrepati yan maburu jenek i ramya ning giri wana

Hanan umulih mareng kuwukuwu maluy amawa ri sang paranrepawadhu

Kadi lari ning macangkrama hanan kadi tumekani rajya ning ripukula

Wruh ira ri dosa ning mrga tatan-wyasana sira n-ahingsadharmaginego.

 

2. Caritan ulah niran madan umantuka mangen i kalangwan ing swanagara

Krama subhakala mangkat ahawan banu-hanget i banir muwah talijungan

Amegil i wedwawedwan irikang dina mahawan i kuwarahari celong

Mwang i dada margga rantang i pager talaga pahanangan tekeka dinunung.

 

3. Rahina ri tambak i rabut wayuha ri balanak linakwan alaris

Anuju ri pandakan ri bhanaragina megil i dateng nire padamayan

Maluy angidul mangulwan umare jajawar i suku sang hyang adri kumukus

Marek i bhatara dharmma saha puspa pada pada hagarjita wwang umulat.

 

[Pupuh 56]

 

1. Ndan tingkah nikanang sudharmma ring usana rakwa kareno

Kirtti sri krtanagara prabhu yuyut nareswara sira

Tekwan rakwa sirang adhistita sarira tan hana waneh

Hetunyangdwaya saiwa boddha sang amuja nguni satata.

 

2. Cihneng candi ri sor kasaiwan apucak kaboddhan i ruhur

Mwang ri jro siwawimba sobhita halep niraparimita

Akshobya pratime ruhur mmakuta tan hanolya nika

Sangke siddhi niran winasa tuhu sunyatatwa parama.

 

[Pupuh 57]

 

1. Hana mata kareno tewek sang hyang akshobyawimba n-hilang

Prakasita padapaduka sri mahagurw i rajadhika

Sutapa suci susila boddhabrata srawakanindita

Anupama bahusisya sampun maciryy an mahapandita.

 

2. Sira ta mahas atirtha seccha megil ring sudharmme dalem

Pranata marek i sang hyang arccatibhakty adara ngastuti

Ya ta ng amuhara salya ni twas nirang sthapakanangsaya

Ri wenanga nira n-abaktya ri hyang siwarccatanangaksama.

 

3. Muniwara mawarah sire tatwa sang hyang suddharmmeng dangu

Mwang i hana nira sang hyang akshobhyawimbatisuksme ruhur

Ryy ulih ira n-umaluy muwah manghinep ring sudharmmomarek

Salahasa kawengan siranton ri muksa hyangng arccalilang.

 

4. Pilih analasararkkha  rakwa sakabda hyang arcca n-hilang]

Ri hilang ira sinamber ing bajraghosa sucandi dalem

Pawarawarah irang mahasrawakawas ndatan sangsaya

Pisaningu waluya dharmma tekwan kadohan huwus.

 

5. Aparimita halep ni tingkah nika swargga tulyanurun

Gupura ri yawa mekala mwang bale nyasa kapwadhika

Ri dalem inupacarra sek nagapuspanedeng

Prasama wijah arumpukan sara sang stri dalem nagari.

 

6. Pira karika lawas narendran sukacangkramapet lango

Ri wulu dada tataka mendah pakisnyangjrah i jro banu

Pinaran ira n-amurwwa sangke suddharmmangken arkkapanas

Mwang umara ri pakalwangan tut jurang secca ning twas ginong.

 

[Pupuh 58]

 

1. Warnnan i sah nira ring jajawar i padameyan ikang dinunung

Mande(gi) cunggrang apet kalangen umahas ing wanadesa lengong

Dharmma karesyan i parswa ning acala pawitra tikang pinaran

Ramya nikanpangungan luralurah iniket nira bhasa kidung.

 

2. Sampun iranglengeng enjing atihang ikanang ratha sampun adan

Mangkat angulwan i jong ning acala mahawan sakamargga dangu

Prapty amegil ri japan nrpati pinapag ing balasanggha datang

Sing kari ri pura moneng i parekan ikan pada harsa marek.

 

3. Kala dawuh tiga tang diwasa ri panadah nrpati n-mapupul

Mukya mareswara rama haji kalih umunggu atitah pinarek

Sang nrpati matahun ri paguhan i hiring nrpati-n-tanadoh

Kapwa sadampati soway i panadah irekena tan wuwusen.

 

[Pupuh 59]

 

1. Narapati mangkat enjing ahawan sakatan lumaris

Rakawi lumaryy animpang i rabut tugu lan pangiring

Sumeper i pahyangan katemu tang kula wandw apupul

Pada masegeh mupaksamaken alpa nikan dunungen.

 

2. Nrpati halintang ling banasara mwang i sangkan adoh

Dateng i paminggir ring pura pilih ghatita rwa huwus

Sakahenu sok lebuh nika gajaswa padaty asusun

Kimuta marang kebo gawaya pandarat arddha penuh.

 

3. Kadi tinitah lari sakrama yanpadulur

Nrapati pajang saha priya sabhrtya siran rumuhun

Nrpati ri lasem ri wuntat ira mangkat amuwah tanadoh

Ratha nira kapwa sobhita maweh suka ning lumihat.

 

4. Narapati ri daha nrpati ri wengker umunggw i wugat

Nrpati ri jiwane wuri sabhartta sabhrtya  tumut

Makapamekas ratha nrpati kirnna sapanta penuh

Pirang iwu kapwa sayudha tikang bhata mantry angiring.

 

5. Tucapa tikang wwang ing lebuh atambak i tambing atip

Atetel ayo manganti ri halintanga sang nrpati

Daradara tang wadhu metu mareng lawang atry arebut

Hana kahuwan salampur i panas nika yarpalayu.

 

6. Ikanang adoh grhanya marebut kayukayw aruhur

Makaburayut ri pang nika raratuha manwam atob

Hana tirisan lirang ywa pinanek nika tanpanaha

Sahaja lali’n katon pijer anona juga ng kinire.

 

7. Ri dateng irang narendra kalasangka humung mabarung

Sahanan nikang wwang ing lebuh umendek ares mararem

Ri kahaliwat niratri tikanang mangiring ri wugat

Gaja kuda garddabhostra gulungan gumulung tanaren.

 

[Pupuh 60]

 

1. Ikang adarat bala peka marampak

Pipikupikul nika kirnna ri wuntat

Marica kasumbha kapas kalapa wwah

Kalar asem pinikul saha wijyan.

 

2. I wuri tikang mamikul abwat

Kapasahar epwan arimbit anuntun

Kirikirik ing tengah ing kiwa benjit

Pitik itik ing kisa mewed arangkik.

 

3. Sasiki pikul pikulanya manghanta

Kacu kacubung bung upih kamal anwam

Tapi kukusan haru dang dulang uswan

Lwir amurutuk saranya ginuywan.

 

4. Nrpati pareng dateng i pura warnnan

Telas umulih ri dalem ira sowang

Atutur i solah ulah nira ngunten

Asing anukana para swa ginong twas.

 

[Pupuh 61]

 

1. Lungha ng kala nrepati tan alawas ring rajya

Prapta nga saka dwi gaja rawi bhadra ng masa

Ngka ta sri-natha mara ri tirib mwang sompur

Burwan sarsok yyalas ika dinulunyakweh.

 

2. Ndan ring saka tri tanu rawi ring  wesaka

Sri-natha muja mara ri palah sabhrtya

Jambat sing ramya pinaran iran lalitya

Ring lwang-wentra mmangu ri balitar mwang jimbe.

 

3. Janjan sangka balitar angidul tut margga

Sengkan poryyang gatarasa tahenyadoh wwe

Ndah prapteng lodaya sira pirang ratry angher

Sakte rum ning jaladhi jinajah tut pinggir.

 

4. Sah sangkeng lodaya sira manganti ri simping

Swecchanambyamahajonga ri sang  hyang dharmma

Sak ning prasada tuwi hana dohnyangulwan

Na hetynyan bangunen angawetan matra.

 

[Pupuh 62]

 

1. Mwang tekang parimana tapwa pinatut wyaktinya lawan prasasti

Hetunyan tinepan  samapta dinepan purwwadi sampun tinugwan

Ndan sang hyang kuti ring gurung-gurung inambil bhumya sang hyang suddharmma

Gontong wisnu rineka bajradharaneka pangheli sri-narendra.

 

2. Ryy antuk sri-narapaty amargga ri jukung joyanabajran pamurwwa

Praptararyyan i bajra-laksmi n-amegil ring surabhane sudharmma

Enjing ryy angkat iran pararyyan i bekel sonten dateng ring swarajya

Sakweh sang mangiring muwah telah umantuk ring swawesmanya sowang.

 

[Pupuh 63]

 

1. Enjing sri-natha warnnan mijil apupul aweh sewa ring bhrtya mantri

Aryyadinya ng marek mwang para patih atata ring witana n-palinggih

Ngka sang mantry apatih wira gajamada marek sapranamyadarojar

An wwanten rajakaryyolihulih nikanang dharyya haywa pramada.

 

2. Ajna sri-natha sang tribhuwana-wijayottunggadewi

Sraddha sri-rajapatni wekasana gawayen sri narendreng kadatwan

Siddha ning karyya ring saka siwasa masirah warnna ring bhadramasa

Sakweh sri-natha rakwawwata tadah iringen de para wrddha mantri.

 

3. Nahan ling sang sumantri teka subhaya maweh tusta ri sri-narendra

Sonten praptomarek tang para dapur aputih sajjanadinya wijna

Mwang mantry asing wineh thany asuruhan amakady aryya ramadhiraja

Tan len gong ning byayanu sinadasada ginosti harep sri-narendra.

 

4. Byatitan meh teka ng bhadrapada ri tilem ning srawana teki warnnan

Sakwehnya ng citrakaranikanikel amangun sthana singheng wanguntur

Dudw ang malad wawan bhojana bukubukuran mwang tapel saprakara

Milwang pande dadap kancana rajata padewer mmatambeh swakaryya.

 

[Pupuh 64]

 

1. Ndah prapta ng subhakala sampun atitah tekang sabhanindita

Ngkane madhya witana sobhita rinengga lwir prisadyyaruhur

Tunggal tang mabatur silasaka rinaktarjja wuwung hinyasan

Sasry apan pada munggw i sanmuka nikang singhasanatyadbhuta.

 

2. Kulwan mandapa sapralamba winangun sthana narendrapupul

Lor tekang taratag pinik  mider amurwwatumpatumpa wugat

Stri ning mantri bhujangga wipra ng inaha talpanya sampun pepek

Ngkane  daksina bhrtyasanggha taratagnyasangkya kirnnasusun.

 

3. Ndan tingkah ni gawe narendra wekas ing sarwwajnapujadhika

Sakweh sang wiku boddhatantra gata saksing mandalalekana

Mukya sthapaka sang purohita masadpade suddharmmenadhi

Labdhawega susila satwika tetes ring sastra tantraya.

 

4. Sangke wrddha niran sahasramasa ring swotpatti manggong tutur

Wwanten hina nireng swakaya kimuta ng satsisya makweh marek

Ngka mpungkw ing paruh aprasiddha patangan lampah nireng mandala

Mudra mantra japanut udhara minusty angde tepet ning hidep.

 

5. Tanggal ping rwa welas manginjem irika swah sutrapatheniwo

Mwang homarccana len parisrama samapte  prapta ning swah muwah

Sang hyang puspa yinoga ring wengi linakwan supratista kriya

Poh ning dhyana samadhi siddhi kinenaken de mahasthapaka.

 

 

[Pupuh 65]

 

1. Enjing purnnamakala kala ni wijil nira pinarek i madhya ning sabha

Ghurnna ng kahala sangka len padahaganjaran i harepasangkya mangdulur

Ring singhasana sobhitaruhur manusa kahanan iran winursita

Sakweh sang para sogatanwam athua telas apupul amuja sakrama.

 

2. Ngka ta sri-nrpati n-pareng marek amuspa saha tanaya dara sadara

Milw ang mantry apatih gajamada makadi nika pada maso mahan marek

Mwang mantry akuwu ring paminggirathawa para ratu sahaneng digantara

Sampunyan pada bhakty amursita palinggihan ika tinitah yathakrama.

 

3. Sri-natheng paguhan sireki rumuhun humaturaken anindyabhojana

Sang sri-handiwahandiwa lwir ia tapel nira n-amawa dukula len sereh

Sri-natheng matahun tapel nira sitawrsabha hana maminda nandini

Yekametwaken artha bhojana mijil saka ri tutuk apurwwa tanpegat.

 

4. Sang sri-natha ri wengker apned awawan yasa pathani tadah niradhika

Sarwwendah racananya mulya madulur dhanawitarana wartta ring sabha

Sri-natheng tumapel tapel nira tang indah araras asarira kamini

Kapwateki matunggalan dina siranpawijil i kawicitran ing manah.

 

5. Mukya sri-narapaty apurwwa giri mandara wawan ira bhojanadbhuta

Kalanyan pinuter tapel wiwudhadaityagana mider ares twas ing mihat

Lemboratyaya gongnya kabhinawa polaman angebek aliwran angdulur

Kadyagrah mawero tekap ni banu ning tasik amewahi ramya ning sabha.

 

6. Ndann angken dina salwir ing tapel asing lewih adhika niwedya don ika

Stri ning mantry upapatti wipra dinuman sakari nika duweg matunggalan

Mwang sang ksatriya wandhawa nrepati mukya sira rinawehan sasambhawa

Len sangkeng warabhojanederider edran i sabala narendra ring sabha.

 

[Pupuh 66]

 

1. Enjing rakwa kaping nem ing dina bhatara narapati sabhojanakrama marek

Mwang sang ksatriya sang padadhika penuh yasa bukubukuran rinembat

Asusun

Dharmmadhyaksa kaih sireki n-awawan banawa pada winarnna bawa

Kakidung

Gongnya lwir tuhu palwa gong bubar agenturan angiring aweh resep ning

amulat.

 

2. Ratryan sang mapatih gajamada rikang dina muwah ahatur niwedya n-umarek

Stryanggeng soka tapel nirarjja tiheb ing bhujagakusuma rajasasrang awilet

Mantry aryyasuruhan pradesa milu len pra dapur ahatur niwedya n-angiring

Akweh lwir ni wawanya bhojana hanan plawa giri yasa mataya tanpapegetan.

 

3. Atyadbhuta halep ni karyya naranatha wekas ing mahottama dahat

Apan ring dina sapta tanpegat tikang dhana wasana sabhojanaparimita

Lumre sang caturasrama pramuka sang dwija milu paramantry asangkya kasukan

Kahyunhyun juru samy amalwang atepat kapilarih ika lwir ambuh umili.

 

4. Sarsok tekang aninghaninghali sakeng dasadik atetel atri tanpaligaran

Tingkah ning pasabhan lawan sang ahatur ttadah atiki tinonya n-asrang arebut

Sri-raja rikanang witana mangigel bini bini juga tang maninghali marek

Kapwalinggih atindih agelar angebek hana lali ring ulah kawongan amulat.

 

5. Sasing karyya maweha tusta rikanang parajana winangun nareswara huwus

Nang widw amancangah raketraket anganti sahana para gitada pratidina

Anyat bhata mapatrayuddha sahaja ng magelagelapan anggyat angdani paceh

Mukya ng dana ri salwir ing manasi tanpegat amuhara harsa ning sabhuwana.

 

[Pupuh 67]

 

1. Yawat mangka lekas narendra magawe araddhangiwo sang paratra

Tawat tan pakawandhya n-angdani suke sri-rajapatni n-kinaryya

Astw angdadyakena ryy anugraha nire swastha ny adeg sri-narendra

Sang sri-raja sanagarastu jaya sastrwahingana  ng candra surya.

 

2. Enjing kala datang mamuja para boddhanguraken sang pinuja

Prajnaparamita temah nira n-umantuk ring mahabuddhaloka

Sang hyang puspasaira sighra linarut sampun mulih sopakara

Sakweh caru ganjaran tuwi dinum lumrerikang bhrtyasanggha.

 

3. Lila suddha manah narendra ri huwus ning karyya norang wikalpa

Anghing dharmma nireki pinrih i kamal-pandak ri dadyanya purnna

Tekwan sampun i bhumi suddha rikanang sakagnisaptarkka ngunten

Sang sri-jnanawidhi n-lumakwani teher mabrahmayajna n-pamuja.

 

[Pupuh 68]

 

1. Nahan tatwa nikang kamal widita de ning  sampradaya sthiti

---------------------------tak terbaca---------------------------------

Mwang  sri panjalunatha ring daha tewek ing yawabhumy apalih

Sri-airlangghya sirangdani ryy asih iranpanak ri sang rwa prabhu.

 

2. Wwanten boddha mahayanabrata pegat ring tantra yogiswara

Sang mungge ing tengah i smasana ri lemah citranusir ning jagat

Sang prapteng balitoyamargga manapak wwai ning tasik nirbhaya

Kyati hyang mpu bharada wodha riy atitadi trikalapageh.

 

3. Rahyang teki pinintakasihan amarwang bhumi tan langghana

Hinganyeki telas cicihna nira toying kundi sangkeng langit

Kulwan purwwa dudug ring arnnawa ng lor kidul tan madoh

Kadyadoh mahelet samudra tewek ing bhumi jawarwa prabhu.

 

4. Ngke ring tiktiki wrksa rakwa sutapararyyan sangkeng ambara

Nang deseng palungan tikang pasalahan kundi prasasteng jagat

Kandeg dene ruhur nikang kama i puncaknyangawit ciwara

Nahetunya sinapa dady alita tekwan mungw iring pantara.

 

5. Tugw anggoh nika tambay ing jana padares mintareng swasana

Hetunyan winangun sudhatmma waluya ng bhumi jawatunggala

Sthitya raja sabhumi kawruhana ning rat dlaha tan linggara

Cihna sri-nrpati  n-jayeng sakalabhumi n-cakravarttiprabhu.

 

[Pupuh 69]

 

1. Prajnaparamitapuri ywa panelah ning rat ri sang hyang suddharmma

Prajnaparamitakriyenulahaken sri-jnanawidhy apratistha

Sotan pandita wrddha tantragata labdawesa sarwwagamajna

Saksat hyang mpu bharada mawaki sirangde trtpti ni twas narendra.

 

2. Mwang tekiri bhayalango nggwan ira sang sri-rajapatnin-dhinarmma

Rahyang jnanawidhinutus muwah amuja bhumi suddhapratista

Hetunyan mangaran wisesapura karambhanya pinrih ginong twas

Mantry agong winekas wruhireka demung bhojanwam utsaha wijna.

 

3. Lumra sthana niranpinuja winangun caityadhi ring sarwwadesa

Yawat wesapuri pakuwwan i kabhaktyan sri-maharajapatni

Angken bhadra siranpinuja ning amatya brahma sakwehnya bhakti

Mukti swargga niran mapotraka wiseseng yawabhumi ekanatha.

 

[Pupuh 70]

 

1. Irikang anilastanah saka nrpeswara warnnanen

Mahasahas i simping sang hyang dharma rakwa siralihen

Saha widhiwidhanasing lwir ning saji krama tan kurang

Prakasita sang adhyaksamujaryya rajaparakrama.

 

2. Rasika nipuneng widya tatwopadesa siwagama

Sira ta mangadhistane sang sri nrpati kretarajasa

Duweg inulahaken tang prasada gopuramekala

Prakasita sang aryyanama krung prayatna wineh wruha.

 

3. Nrpathi n-umulih sangke simping wawang dating ing pura

Prihati tekap ing gring sang mantry adhimantri gajamada

Rasika sahakari wrddhya ning wawawani ring dangu

Ri bali ri sadeng wyakty ny antuk nikanayaken musuh.

 

[Pupuh 71]

 

1. Try angin ina saka purwwa rasika n-papangkwaken i sabwat ing sabhuwana

Pejah irikang sakabdha rasa tanwinasa naranatha mar salahasa

Tuhun ika diwyacitta nira tan satrana masih i samastabhuwana

Atutur i tatwa ning dadi n-anitya punya juga ginong pratidina.

 

2. Kunang i pahom narendra haji rama sang prabhu kalih sireki pinupul

Ibu haji sang rwa tansah athawanuja nrepati karwa sang priya tumut

Gumunita sang wruheng gumunadosa ning bala gumantyane sang apatih

Linawelawo ndatan hana katrpti ning twas mangun wiyoga sumusuk.

 

3. Nrpati sumimpen ing naya taten kagantyana keta sumantri mapatih

Ri taya nikang gumantya yadi kewehanya tikanang jagat pahalalun

Nghing ikang amatya sadhw ajara sarwwakaryya satate narendra pilihen

Pituhunen ing mucap kirakira wruheng parawiwada tanpanasara.

 

[Pupuh 72]

 

1. Mangka hingan i pahom nira gupta

Poh ny alapkena niranpawiweka

Wrddhamantri pinilih ta sang aryya

Atma raja makanama pu tandi.

 

2. Tansah indik i narendra sang aryya

Wira mandalika nama pu nala

Sadhwasadhu hitanigrahawijna

Mancanagara Manama tumanggung.

 

3. Tus ning adhiguna wira susatya

Nityasadhipati ning bala mangdon

Nang digantara Manama ri dompo

Bhrasta de nira sek alwang I satru.

 

4. Rwata wastu ni pangadi sumantri

Astapaddha haji don ika tanlen

Mawwate sarusit ing wyawahara

Ndan makeringa sumantry upapati.

 

5. Sang patidami tikang yuwamantri

Sang hinatyan i dalem pura tansah

Mwang patih tikang anama pu singha

Saksya ring sakawekas naranatha.

 

6. An mangkana titah naranatha

Trpati langgeng apageh tikanang rat

Satya bhakti nika mangkin atambah

Keswaran haji dumeh nika mangka.

 

[Pupuh 73]

 

1. Ndan nrpa tiktawilwapuraraja mangkin atiyatna niti ring ulah

Ring wyawahara tan hana kasinghit ing hati sapon ning agama tinut

Tan dadi paksapata yat aweh wibhuti saniruktya ring jana kabeh

Kirtti ginong niran wruh ing anagatadi tuhu dewamurti sakala.

 

2. Ngka tikanang sudharmma haji suk ni sang tuhatuha nareswara dangu

Salwir ikang turung pinahuwus nirengapi rinaksa pinrih iniwo

Sing katayan prasasti winekas prasastyana ri sang widagdha ring aji

Sthitya phalanya tanpatemaha wiwada tumuse satus nira helem.

 

3. Kweh nikanang sudharmma haji kaprakasita makadi ring kagenengan

Lwir nikanang mangadi tumapel kidal jajaghu wedwawdwan i tuban

Mwang pikatan bukul jawajawantang antarasasi kalang-brat i jaga

Len balitar silahrit waleri babeg i kukap ri lumbang i puger.

 

[Pupuh 74]

 

1. Mukyantahpura sagalathawa ri simping

Mwang sri-ranggapura muwah ri Buddha kuncir

Prajnaparamitapuri hanar panambeh

Mwang tekang ri bhayalango duweg  kinaryya.

 

2. Na tang dharma haji wilang saptawingsa

Ring sapta dwija rawi saka bhadramasa

Kapwamatya nipuna tang wineh matunggwa

Lawan sthapaka wiku rajya sastrawijna.

 

[Pupuh 75]

 

1. Ndan sang mantri wineh wruha rika kabeh sang aryya wiradhikara

Dharmmadhyaksa rumaksa salwir ikanang dharmme dalem tan pramada

Dhirotsaha nitya kuminkini swastha pararttha sang sri-narendra

Tan mukti pgala ning swakaryya ri genganyutpatti sang hyang sudharmma.

 

2. Len tang dharma lepas padekana rinaksadegnya de sri narendra

Saiwadhyaksa sirang wineh wruha rumaksa parhyangan mwang kalagyan

Boddhadhyaksa sireki raksaka ri sakweh ning kuti mwang wihara

Mantri her-haji tang karesyan iniwonyan raksake sang tapaswi.

 

[Pupuh 76]

 

1. Lwir ning dharma lepas pratista siwa mukya kuti balay i kanci len kapulungan

Roma mwang wiwatan iswaragrha palabdhi tajung i kuta lamba len ri taruna

Parhyangan kuti-jati candi lima nilakusuma harinandanottamasuka

Mwang prasada haji sadang muwah i panggumulan i kuti sanggraha jayasika.

 

2. Tan karyya spatikeyang i jaya manalw i haribhawana candi pungkal i pigit

Nyudante katude srangan kapuyuran dayamuka kulanandane kanigara

Rembut lan wuluhen muwah ri kinawong mwang i sukawijayathawa ri kajaha

Sampen mwang rati-manmathasrama kula kaling i batu putih teka pameweh.

 

3. Lwir ning dharma kasogatan kawinayanu lepas i wipularama len kuti haji

Mwang yanatrayarajadhanya kuwuratha surayasa jarak lagundi wadari

Wewe mwang pacekan pasarwwan i lemah surat i pamanikan srangan pangiketan

Panghawan damalang tepas jita wanasrama jenar i samudrawela pamulung.

 

4. Baryy angng amretawarddhani wetiwetih kawinayan i patemwan ing kanuruhan

Wengtal wengker i hanten ing banu jiken batabata pagagan sibok padurungan

Mwang pindatuha len telang surabha mukya nika ri sukalila ta pwa pameweh

Tan warnnan tikanang mangenwaya ri pogara ri kulur i tangkil adi nika son.

 

[Pupuh 77]

 

1. Nahan muwah kasungatan kabajradharan akrameka wuwusen

Isanabajra ri nadi tada mwang I mukuh ri sambaing i tanjung

Lawan tang amretasabha ri bangbang iri boddhimula waharu

Tampak duri paruha tandare kumuda ratna nandinagara.

 

2. Len tang wunganjaya palandi tangkil asahing samicy apitahen

Nairanjane wijayawaktra megeneng i poyahan balamasin

Ri krat lemah tulis i ratnapangkaja panumbangan kahuripan

Mwang ketaki talaga jambale jungul i wisnuwala pameweh.

 

3. Len tang budur wwirun i wungkulur mwang i mananggung ing watukura

Bajrasana mwang i pajambayan ri samalanten ing simapura

Tambak laleyan i pilanggu pohaji ri wangkali mwang i beru

Lembah dalinan i pangadwan adi nika ring pacarccan apageh.

 

[Pupuh 78]

 

1. Lwir ning dharma lepas karesyan i sumpud  rupit mwang pilan

Len tekang pucangan jagaddhita pawitra mwang butun tankasah

Kapwateka hana pratista sabha len lingga pranalapupul

Mpungku sthapaka sang mahaguru panengguh ni sarat kottama.

 

2. Yeking dharma lepas rinaksa mapageh ring swakramanyen dangu

Milw ang sima ta pratista pinakadinya’n swatantra sthiti

Bangwan tungkal i siddhayatra jaya len siddhahajong lwah kali

Twas wasista palah padar siringan adinyang kasaiwangkuran.

 

3. Wanjang bajrapure wanora makeduk hanten guha mwang jiwa

Jumput sobha pamuntaran baru kaboddhangsan prakasottama

Kajar dana hanar turas jalagiri centing wekas wandira

Wendayan gatawang kulampayan i taladinya karsyangkuran.

 

4. Dharmmarsi sawungan belah juru siddha (ng) srangan waduryy agelan

Gandhatrap harasalan ampu kakadang hajyan gahan ring jagat

Sima nady abhaye tiyang pakuwukan sima kiyal mwang suci

Tamkaryy ang kawiri barat kacapangan ywanggegnya sima pageh.

 

5. Len sangkerika wangsa wisnu kalap ing batwan kamangsyan batu

Tanggulyan dakulut galuh makalaran mukya swatantrapageh

Len tang desa medang hulun hyang i parung lunge pasajyan kelut

Andel mad paradah geneng pangawan adinya nluput ring dangu.

 

6. Tan warnnan tikanang kalagyan anelat ring sarwwadeseng jawa

Lawan tang kuti sapratista ng ilu tang tanpratistapageh

Ndan bhedanya kacandikan sthiti kabhuktyanyan sake nagara

Mwang kasthapakan unggwan ing lumagilagy amrih kriya mwang brata.

 

7. Len  tang mandala mula sagara kukub purwwasthitinyeniwo

Tankaryy ang sukayajna kasturi caturbhasmeka ling sang rsi

Katyagan caturasrame pacira bulwan mwng luwan new kupang

Akweh iranya mangasrayeng thani lawan janggan prasiddheng jagat.

 

[Pupuh 79]

 

1. Sampun tang  sarwwadeseng jawa tinapak adegnyeki nguni linakwan

Dharma mwang sima len wangsa hilahila huluntyang kuti mwang kalagyan

Sakweh ning sapramana pinagehaken asing nispramana ginegwan

Mantuk ring desa bhrtya n-sinalahaken ingg aryya ramadhiraja.

 

2. Sri-nateng  wengker otus manapaka rikang desa sakwehnya warnnan

Sri-nateng singhasaryy otus anapaka ri gong ning dapur saprakara

Kapwagegwan patik gundala sira miwo  karyya tanlambalamba

Hetunya ng yawabhumy atutur ing ulah anut sasana sri narendra.

 

3. Ngka tang nusantara baly amatehan i sacara ring yawabhumi

Dharma mwang srama lawan kuwu tinapak adegnyeki sampun tiningkah

Sang boddhadhyaksa munggw ing badahalw ing gajah tanpramada

Wruh ri kweh ning suddharme kasugatan inutus sri-narendran rumaksa.

 

[Pupuh 80]

 

1. Lwir nikanang kasogatan i bali kadhikaranan muwah kuti hanar

Lawan i purwwanagara muwah wihara bahu ng adhirajya kuturan

Nem tikanang kabajradharan uttama nghing wihara tang kawinayan

Kirnna makadi ng aryya-dadi rajasanmata kutinya tan wicaritan.

 

2. Wilwatikang suddharmma ri bukit sulang lemah i lampung anyawasudha

Khyaty angaran tathagatapura grhasthadhara suprasasti n-amateh

Bhyoma rasarkka saka diwasa-nya suk nrpati jiwaneswara dangu

Wrddhasumantry upasaka ng abhumi suddha teher apratista n-inutus.

 

3. Salwir ikang swatantra tuhu sapramana pageh tekap narapati

Kirtti sang adi-sajjana  sakawakanya ya rinaksa mogha tinengot

Mangka juga swabhawa sang inuttama prabhuwisesa digjaya wibhuh

Nyama muwah rinaksa sahana ni kirtti nira de ni sang prabhu helem.

 

4. Mwang makadon katona taya ni duratmaka rikang sabhumi kacaya

Hetu nikang pradesa tinapak tinut sawaler samudra jinajah

Sthitya nirang tapaswi sahaneng parir wukir alas pradesa kasenet

Trtya miwo tapabrata samadhy anambyaken i haywa ning sabhuwana.

 

[Pupuh 81]

 

1. Gong nya arambha nareswara pageha sang tripaksa jawa

Purwwacara nireng prasasty alama tang rinakse niwo

Kotsahan haji yatna don ira wineh patik gundala

Tan wismrtya nireng caradhigama siksa len sasana.

 

2. Nahan karana sang caturdwija padangusir kottama

Wipra mwang rsi saiwa boddha tetep ing swawidya tutur

Sakweh sang caturasrama pramuka sang caturbhasma sok

Kapwateka tumungkul ing brata widagdha ring swakriya.

 

3. Ngka sakweh nira sang caturjjana pada athiting sasana

Antri mukya sang aryya karwa nipuneng kabhupalakan

Kryankryan ksatriyawangsa len wali susila  yatneng naya

Milw ang waisya sabhumi sudra jenek i swakaryyapageh.

 

4. Yekang janma catur sujanma n-umijil sakeng hyang widdhi

Ling ning sastra wenang sagatya nika de narendreng pura

Kapwekapageh ing swasila kimutang kujanmatraya

Nang candala meleca tuccha pada yatna ring swakarma.

 

 

 

 

[Pupuh 82]

 

1. An mangka lwir nikang bhumi jawa ri pangedeg sri-natha siniwi

Norang sandega ri twas nira n-umulahaken kirttyanukani rat

Tekwan sri-natha karw amwangi haji n-agawe sad dharma kusala

Mwang penak sri-narendra pratuha tumut i buddhi sri-narapati.

 

2. Sri-nathe singhasaryy anaruka ri sagada dharmmaparimita

Sri-nathe wengker ing surabana pasuruhan lawan tang i pajang

Buddhadhistana tekang rawa ri kapulungan mwang  locanapura

Sri-nathe watsarikang tigawangi magawe tusteng parajana.

 

3. Sakweh ning mantri sampun krtawara sinungan simasirasiran

Caitya prasada ta pwang ginaway ika lawan linggadi satata

Bhakting hyang bhakti ri pitregana samasamatwang ring muniwara

Dana mwang kirtti punyenulahaken ika solah sang prabhu tinut.

 

[Pupuh 83]

 

1. An mangka kottaman sri-narapati siniwing tiktawilwaikanatha

Saksat candreng sarat kastawan ira n-agawe tusta ning sarwwaloka

Lwir padma ng durjjana lwir kumuda sahana sang sajjanasih teke twas

Bhrtya mwang kosa len wahana gaja turagadanya himper samudra.

 

2. Mangkin rabdhekanang yawadharani kapawitranya ring rat prakasa

Nghing jambhudwipa lawan yawa keta ng inucap kottamanyan sudesa

Dening kweh sang widagdheng aji makamuka sang dhyaksa saptopapatti

Mwang panjy ang jiwalekan tangara sing umungup karyya kapwatidaksa.

 

3. Mukya ng sri-brahmaraja dwija parama mahakawya anindyagamajna

Henty ang tarkkadi kawruh nirang nipuna mahakawya naiyayikadi

Mwang danghyang bhamanatibrata kusala  tameng weda sat karma suddha

Astam sri-wisnu sakte sama japa makadon wrddhya ning rat subhiksa.

 

4. Hetunyanantara sarwwajana teka sakeng anyadesa prakirnna

Nang jambudwipa kamboja cina yawana len cempa karnnatakadi

Goda mwang syangka tang sangkan ika makahawan potra milw ing wanik sok

Bhiksu mwang wipra mukyan hana teka sinungan bhoga tusta npanganti.

 

5. Ndan angken phalguna sri-nrpati pinaripujeniwo ring swarajya

Prapta ng mantri sabhumi jawa juru kuwu len dhyaksa sarwwopapatti

Milw ang balyadi nusantara sahana saha prabhreti n-tanpegat sok

Byapari mwang wanik ring peken angebek atep sarwwabhandanya kirnna.

 

6. Tingkah ning puja n-idran bhrisadisaha mrdanggenarak ring wwang akweh

Ping pitw angken dinembuh sasiki saha niwedya n-dunung ring wanguntur

Homa mwang brahmayajnenulahaken ira sang saiwa boddha n-pamuja

Amwit ingng astami krana makaphala rikang swastha ni sri-narendra.

 

[Pupuh 84]

 

1. Prapta ng diwasa kaping padbelas i wijil sri-narapati warnnan

Tingkah nira mider ing nagara marasuk bhusana kanakadi

Sobhabhra pinikul ing jampana mahawan lantaran atuntun

Mantri sasiwabhujanggadi nika manganggo dadar angering sok.

 

2. Gurnna ng padahi mrdangga trutika dudu ng sangka tara yan atri

Sinrang ni paselur ing bhatagana manguccarana ng abhiwada

Sloka stuti  nira sangkeng  parapura de sang nipunakawindra

Cihna nrepati gahan lwi raghusuta krsnanjaya subhageng rat.

 

3. Sampun nrpati manek ring manimayasinghasana suminabhra

Soddhodani sakala lwir nira wahu sangke jinapada sobha

Byakta trisura surendrang umarek i himbang nira n-apuja hyang

Apan pada linewih bhusana nika sotan wwang adhika mulya.

 

4. Tingkah ni laku nira sri-nrpati pajang sapriya pinakagra

Singhasana bnira sampun lepas inarak ning balagana kirnna

Mantri pajang athawa mantri ri paguhan rowang ika sapanta

Laksarwuda marasuk bhusana saha bhretya dhwaja patahadi.

 

5. Mangkana nrpa ri lasem sapriya ri wugat lampah ira sabhrtya

Mwang sri-nrpa ri kadinten sayugala samatyabala ri wuntat sastri

Sri-jiwanapararajni ri wuri saha bhretyagana sabhartta

Sri-bhupati pamekas mantry adhika sa yawawani mangiring sok.

 

6. Ton tang parajana sarsok penuh ariweg tanpasela manonton

Pinggir nikanang lebuh ajajar tang sakata pinanggung

Dwaranapis awawa lwir dhwaya nguniweh panggung ika rinengga

Sok stry anwam atuha dudw ang mangebek umunggw ing bacingah atimbun.

 

7. Buddhinya daradaran kapwa suka bangun wahuwahu manonton

Tan warnnan ulah ikenjing nrpati kinastryan mijil wanguntur

Wipradi sira maweh amretawarakundyadi wawan ikapned

Mantri parapamegat kapwa merek amuspanjali pareng asrang.

 

[Pupuh 85]

 

1. Tanggal ning caitra tekang balagana mapulung rahy ahem apupul

Mantri mwang tanda len gusti sahana nguniweh wadwa haji tumut

Milw ang mantry akuwu mwang juru buyut athawa wwang ring parapuri

Astam sang ksatriya mwang wiku haji karuhun sakweh dwijawara.

 

2. Don ing human ri tan lamlama ni sang srinatha ring ulah

Kapwanutajar ing rajakapakapa sadangken caitra winaca

Haywangambah ri tan lakwa nika manekateng wastradyarana

Dewaswadinya tatan purugen ika maran swasthang pura sada.

 

[Pupuh 86]

 

1. Akara rwang dina muwah ikang karyya kewwan narendra

Wwanten lor ning pura tegal anamang bubat kaprakasa

Sri-nathengken mara makahawan swana singhapadudwan

Sabhretyanoraken ideran atyadbhuta ng wwang manonton.

 

2. Ndan tingkah ning bubat arahrarddharatatandes alwa

Madhyakrosakara nika n-amarwwanutug rajamargga

Madhyarddhikrosa keta pangalornya nutug pinggir ing lwah

Kedran de ning bhawana kuwu ning mantri sasok mapanta.

 

3. Bwat-bwat munggw ing tengah aruhur atyadbhutadegnya sobha

Sthambanyakweh inukiran athaparwwa tingkah nikapned

Skandhaware nikata nika kulwan raket lwir pure jro

Nggwan sri-natha n-dunung i teka ning caitramasa n-pamanggung.

 

[Pupuh 87]

 

1. Pratingkah ning panggung majajar angalor pascimamuka

Ri sanding lor mwang daksina haji paraksatriya pinik

Sumantri dharmmadhyaksa keta ng umarep wetan atata

Harepnyarddhalwa lwir nika sadawata ning lebuh agong.

 

2. Rika nggwan sri-natha n-parahita maweh netrawisaya

Hanan prang tanding prang pupuh ikang atombokan inadu

Akanjar len prep mwang matalitali moghangdani suka

Hanan pat mwang trikang dina lawas ira sighra n’umulih.

 

3. Ryy ulih sri-nathekang bubat asepi panggungnya dinawut

Samangka tang prang-tandingan inura mangkin sukakara

Ri panglwang ing caitra nrepati n-umiwo srama sahana

Wineh wastra mwang bhojana pada suka n-mamwit umulih.

 

[Pupuh 88]

 

1. Salwir ikang buyut wadana teki tanwawang umantuk amwit i dalem

Aryya ranadhikara dinulur nikadhipati ring enjing humarek

Aryya mahadhikara juru pancatanda pinakadi ring padelegan

Rowang ika n-padamwit i sedang nareswara siran tinangkil apupul.

 

2. Ngka n-pawuwus nareswara ri wengker ojar i parandyanadi wadana

He kita haywa tan tuhu susatyabhakty asih aniwya natha ri haji

Sthitya kiteng kawesyan i singangdane hajenga ning pradesa ya gengen

Setu damargga wandira grhadi salwir ikanang sukirtti pahayun.

 

3. Mukya nikang gaga sawah asing tinandur ika wrddhya raksan ameren

Yawat ikang lemah pinakaramaken pageha tanpadadya waluna

Hetu nikang kulina tan atundung ng aparadesa yan pataruka

Nang pratigundalanya ya tuten ri gonga nikanang pradesa n-usiran.

 

4. Sri-krtawarddhaneswara hamaywani kagengan ing pradesa gawayen

Ndan wilangen mahanasa rika pramada nika ring pejah sasi sada

Milwa ta yomapeksa hana ning duratmaka makady anidra lawana

Wrddhya ni drwya sang prabhu phalanya sadhana niran rumaksa bhuwana.

 

5. Sri-nrpa tiktawilwanagareswarangupasama n-sumanten amuwus

Sonya ngaranya rakwa kadadinya teki katekanya haywa wisama

Yan hana rajakaryya palawang makadi nika tan hana n-lewata

Yang pasegeh muwah wruh anaha swadeha nikasomya laksana gegen.

 

[Pupuh 89]

 

1. Mwang rasa ning pratigundala pangadeg irebu hajika tuten

Enjing yan padangangratengana sabhinukti wikan pasegah

Yan hana murkka tikang sinagehan agawe lara sahasika

Tut sasinambut ika sing awaka nika tujaraken ri kami.

 

2. Apan ikang pura len swawisaya kadi singha lawan sahana

Yan rusaka thani milwa ng akurang upajiwa tikang nagara

Yan taya bhrtya katon waya nika paranusa tekangreweka

Hetu nikan pada raksan apageha lakih phala ning mawuwus.

 

3. Nahan ujar nira ring para wadana sahur nika sapranata

Eka hatur nika tan salah anuta haling naranatha kabeh

Mantry upapatty anganangkil athaca parahandyan ateki marek

Tog tumibeng ghatita traya panadah ireky apupul saritan.

 

4. Uttarapurwa witana kahanan ira sobha rinangga huwus

Ring tri witana matut pada para wadanady apupul tinata

Prapta tikang tadah uttama wawah ika sarwwa suwarnnamaya

Sighra tikang humarep-harepaken atilah ri harep nrpati.

 

5. Lwir ni tadah nira mesamahisa wihaga mrega wok madhupa

Mina lawan tikang anda haja ring aji lokapurana tinut

Swana kara krimi musika hilahila len wiyung alpa dahat

Satrw awamana hurip-ksaya cala nika rakwa yadi purugen.

 

 

[Pupuh 90]

 

1. Praptang bhojana makadon rikang wwang akweh

Sangkep sarwwarajasa bhojanya sobha

Matsyasangkya sahana ring darat mwang ing wwai

Raprep drak rumawuh anut kramanuwartta.

 

2. Manduka krimi kara musika srgala

Kweh sakterika winahan tamahnya tusta

Deni wwang nika dudu ring sadesadesa

Sambeknyeki tinuwukan dumah ya tusta.

 

3. Lwir ning para surasa tan pegat mawantu

Twak nyu twak siwalan arak hano kilang brem

Mwang tampo sing adhika tang hane harep sok

Sarwwamas wawan ika dudw anekawarnna.

 

4. Kombeh mwang guci tikanang prakirnna lumra

Arddhakweh sajang ika dhatw anakawarnna

Tampantya ng larih aliwar bangun wway adres

Sambeknyanggapan umutah wanen byamoha.

 

5. Prahprah nrpati n-awok kusukan pamukti

Yan wwang sakta pada pinaran larihnya limpad

Tan dadyamidhi ring alah telas kasengkwan

Ring wwang mana lagi were ginuywan.

 

6. Ramya ng gitada pangidung nikan maganti

Kirtti sri-nrpati linakwakenya n-angras

Mangkin tusta sang anginum samenake twas

Sowenyalah awekasan maguywaguywan.

 

 

 

 

[Pupuh ke 91]

 

1. Jurw iy angin cucud saha buyut nikana macemaceh

Prapta manrtta ring swara n-umambili sadulur ika

Solahulah nikamuhara guyw anukani lumihat

Hetu nikan wineh wasana tang parawadana kabeh.

 

2. Ri wekasan kinon mareka milw alariha  ri harep

Mantry upapatti kapwa dinulurnya n-alarih angidung

Manghuri kandamohi pangidung ira titir inalem

Sri-nrpati n-widhagda manulanggapi resep alango.

 

3. Gita narendra manghalahelangdani jenger angani

Mrak manawuwwang ing padapa tulya nika ring alngo

Lwir madhu len gula drawa rinok ring amanis anener

Wangsa manghasa tulya nika ring res angunger I hati.

 

4. Aryya ranadhikara lali yan naturi narapati

Aryya mahadhikara ta dulur nika pareng amuwus

An parahanayan  apti wihate sipa n-arakeraket

A juga ling nirateher umantuk adadadadakan.

 

5. Sri-krtawarddhanaeswara mamanjaki sira rumuhun

Ngkana rikang witana ri tengah rinacana dinadak

Sori nireki gitada lawan takes ira rahajeng

Sotan ulah karamyan ikanang guyu juga winangun.

 

6. Ndaluwaran sireki ri dating narapati n-angadeg

Gita niranyat angdani girahyasan ing umulat

Sori nireki susrama nirukti lituhayu waged

Gita nikanghiribhirib aweh rasepan ing umulat.

 

7. Sri-naranatha tansipi wagus nira telas arasuk

Asta tekes nireki n-upabharyya rahayu sawala

Tus ning amatyawangsa wicaksana tetes ing ulah

Hetu niranpabanakl anibaken ucapan angene.

 

8. Nang newanatya kapwa tinapak nira tinewekaken

Hasya makadi tanpegat ikang guyu pareng aselur

Mwang karuna mangun tangis aweh sekel apuhara luh

Hetu nikang tumon pada kamanusan angenangen.

 

9. Singhit ing arkka lingsir irika nrpati n-atelasan

Ngka parahandyan amasap ri padatala haji

Ling nika mukta papa sinungan suka kadi tanirat

Tan wuwusan stutinya haji sampun umulih i dalem.

 

[Pupuh 92]

 

1. Nanka tingkah iranpamukti suka ring pura tumekani sesti ning manah

Ta tahhan ta dahat ndatan malupa ring kaparahitan i haywa ning praja

Anwam ta pwan akabwatan sira tathapi sugata sakalan maharddhika

Dening jnanawisesa suddha pamadem nira ri kuhaka ning duratmaka.

 

2. Ndatan mahuwusan kawiryyan ira len wibhawa nira dudug ring ambara

Singgih sri-girinatha murtti makajanma ri sira n-agawe jagaddhita

Byakta mangguh upadrawawihang i sajna nira manasar ing samahita

Mokta ng klesa keta katona nguniweh wuwusane tika sang sata marek.

 

3. Nahan hetu ni kottaman nrpati kaprakasita pinujing jagattraya

Sakweh ning jana madhyamottamakanista pada mujaraken swara stuti

Anghing sot nika mogha langgeng atuwuh wukira sira pangoban ing sarat

Astwanirwa lawas bhatara rawi candrama sumelehi bhumimandala.

 

[Pupuh 93]

 

1. Sakweh sang panditeng anyadharani mangiket kastawan sri narendra

Sri buddhaditya sang bhiksw agaway i sira bhogawali sloka kirnna

Ring jambudwipa tonggwanira mangara i kancipui sadwihara

Mwang sang wiprangaran sri mutali sahrdayawwat stuti sloka suddha.

 

2. Astam sang panditeng bhumi jawa saha sang sastradaksatiwijna

Kapwagosty angiket sloka hana wacawacan nggwanireki n-pamarnna

Mukya munggw ing prasasti stuti nrpati tekap sang sudharmmopapatti

Sang wruh ring gita giteniket iran angiket stotra lumreng puri jro.

 

[Pupuh 94]

 

1. Ambek sang maparab prapanca kapitut mihati parakawiswareng pura

Milwamarnna ri kastawa nrpati dura pangiket ika lumra ring sabha

Anghing stutya ri jong bhatara girinatha pakena nika mogha sanmatan

Tan len prartthana haywa ning bhuwana mukya ri pageha narendra ring praja.

 

2. Ring sakadrigajaryy amaswaswayujamasa subhadiwasa purnnacandrama

Ngka hingan rakawi n-pamarnnana kadigwijayan ira narendra ring praja

Kweh ning desa rininci don ika pinustaka mangarana desawarnnana

Panggil panghwata sanmata nrpati mengeta ring alawas atpadeng lango.

 

3. Nirwwa teki lawas nirasring angiket kakawin awetu bhasa ring karas

Tanbeyanya sakabda pinrwa nika lambing i telas ika parwwasagara

Nahan teki caturtthi bhismasaranantya nika sugataparwwawarnnana

Lambing mwang sakakala tang winaluyan gati nika n-ameweh turung pegat.

 

4. Donyanmangkana wrddhyayan pangiketeng haji kathamapi tan tame lango

Gong bhaktyasiha natha hetu nika paksa tumuta sang umastawe haji

Sloka mwang kakawin kidung stuti nike haji makamuka desawarnnana

Nghing tohnyeki wilaja niscaya yadin guyuguyun apa deya lampunen.

 

[Pupuh 95]

 

1. Purih ing awak lanenaleh ing adyah akikuk i dusun

Aratu kurang prahasana kumul tuna ring ujar arum

Dugaduga satya sadhu juga sih lalis ika matilar

Mapa karikapa don wruh ika ring smarawidhi wiphala.

 

2. Karana nikanapih wisaya tan  karaketan ing ulah

Wuta tuli wruh anghreninaleh ning alara katilar

Pawarawarah mahamuni duduga rinegep I hati

Pijer angiwo kriyadwaya matangya tan umur atilar.

 

3. Lekas ika tan pahi mwang atapeng giri wana manusup

Agaway umah pahoman asenot jenek amati tutur

Kamala natarnya len asana tanduran ika maruhur

Kamalasana ywa nama nika sampun alawas amatek.

 

[Pupuh 96]

 

1. Prapanca pracacah panca

Pracacad pocapan ceced

Prapongpong pipi pucche prem

Pracongcong cet pacehpaceh.

 

2. Tam tatatita tan tuten

Tan tetes tan tut ing tutur

Titik tantri tanteng tatwa

Tuhun tamtam titir ttitih.

 

[Pupuh 97]

 

1. Samalan pu winadaprih

Prih dana wipulan masa

Tama sansara ring gatya

Tyaga ring rasa sanmata.

 

2. Yasa sang winadanungsi

Sinung dana wisangsaya

Yang aweh magawe tibra

Brati wega maweh naya.

 

3. Matarung tuhu wany aprang

Prangnya wahu turung tama

Masa linggara sunya prih

Prihnya wahu turung tama.

 

[Pupuh 98]

 

1. Yan bwat parakawi maparab winada n-atapa brata krta juga rinegep

Maittryasih ing alulut upeksa ring huwus awarsih ariris ing ulah

Tyage suka wibhawa yata –katemwa sahananukani saphala

Tatan huninga nihati solah ing para-winada cinala ri ni dalem.