TUTURWAHIA

Om Awighnam Asthu! 

Nihan wastuning silanira sang arep asewaka dharma, tan lian maka dasaring kawikun, yogia kengetakena de sang paksa awiwikon. Iki wastunia, karuhun kawruhakena langgeng asalina rupa, bawa, tindaak, tanduk, samaprih ningnia satata, karan inemune kalawan munjine jua prih ayune satata, apanga pada ngalap sor, den wani suka kalah, suka tiwas, suka belog, suka kanistan, suka cineda, suka kelangan. Kewala sira agung asih ring sarwa sarwaning mahurip; ndatan pamati-mati sira ring tan yogia patine; lamun bakal amah, bakal aturan, bakal banten, bakal caru, sing ada gawenya, ika tan yogia matiang.

 

Muah kang wenang patenana denta, kutu, tuma, titih, semut gatel, sakancania kabeh ngit, legu, buyung, ika wenang pinatian de sang wiku. Kewala sira langgeng amegeng kroda satata, gung satosa wirati ri jagat sarat buwana. Jagat nga; sing mamunji. Sarat nga; sing mabayu. Buwana nga; sing mangenot. Muah sira tan panyeda, tan pangalem, ring papa, reka, warna, muang rasa. Rupa nga; ne bagus ayu, jle, luiring jle melah. Raka ne tegeh, endep, lantang, bawak, dalem deken, linggah cupek. Warna nga; putih, barak, kuning, selem, dadu, jingga, ijo, biru, siwah. Rasa nga; lalah, sepet, masem, pakeh, pahit. Ika ta sadrasa nga; gunaning lidah. Ika luiring alania tan cedanen, aywania tan pujinen.

 

Sira ta suka cineda, ingalem pinuji sira tan rena, angur sira laraha, angur sira lapaha, angur sira angela, dahing wong waneh. Asing mahala ika sayogia hreten den brasta kena ring jroning ati. Muah asing kanggeh rahayu, ika ta sayogia pesuang karengenening wang len.

 

Nihan dasendria ring sarira kawruhakena dharmania, luirninia; padenria nga; batis. Pajwindria nga; djlit. Bagopasdendria nga; baga, purus. Panindria nga; tangan. Twakindria nga; cangkem. Ika ta maka lilima karmendria nga.

 

Muah jiwendria nga; netra. Srotendria nga; karna. Parsendria nga; kulit. Ika ta maka lilima jnanendria (djnjanendria) nga.

 

Nihan dharmaning dasendria kawruhakena. Kunang darmaning batis, satata tan paninjak-ninjak, sapalakuning suku mungsi karahayon. Kunang dharmaning silit, tan pengentuti saking rusip muang tang angisingi saking songar muang tan arabengi pada lanang. Kunang dharmaning baga purus, yan lanang tan panggugoni sakawisayaning purus, tan pangambe istri. Kunang yan wong istri tang panggugoni sakawisayaning baga. Kunang dharmaning tangan, tanpanggugoni sakawisayaning tangan umareng ala. Maring ayu juga lakuning tangan satata.

 

Kunang dharmaning cangkem satata angucap sabda manahara, apes masor somia srenggara, angalap sihing jagat mangrenge. Ndatan linyok, kewala ujar sadhu basaja masatya tuhu, tan ajum, tan injek, tan angkara, tan capala, gangsul, tan pisuh, tan sumpah, tan drapata, tan singgih, tan angaku-aku, tan kumaka wiku, mabisa dawak, tan pangumpet ring len, tan bijal, tan cecemlek, kewala sabda enak satata wedalnia. Telas samangkana dharmaning cangkem.

 

Kunang dharmaning lidah, ndatan panggatgat luiring rasa enak, kewala darana sira ring rasa, ndatan apik, tan wigih, tan praceda ring rasa, hanangalem ring rasa, ala ayuning rasa, samahita denira; apan lega santosa ring rasa, kewala sok pangupajiwa kahitung, anging enak tan enak, samahita denira amangan, ndatan kroda runtik ring amangan. Telas samangkana dharmaning lidah kajarnia.

 

Kunang dharmaning irung, luirnia; Suci juga sira ring ganda, mijik banges, samahita pangadeke, tur tan praceda ring durganda, mangalem ring suganda muang tan salah aras, tan salah ambung, kewala suci ganda juga kang ginanda, bayu tan angangsur wetunia, aris satata wetune. Telas samangkana dharmaning irung kajarania.

 

Kunang dharmaning netra luirnia; Ndatan pati not-noten ring sakaluiring mahala, ika ayu juga tontonen, eda paliat abunis arum satata, mrih ulat umingsor, ulat jatmika wruh ing smita tur tan katresnan sira ring sakaluiraning sakaton kabeh, muang tan katresnan mulating sarajadrewe kabeh, muang tan tresna mulating anak putu buyut muang sanak rabi, bapa babu, kaki nini muang tan tresna mulating kadang warga mitra kabeh lanang wadon. Kewala smitaning  ulat ring sasaman kabeh, den kadi matonia nyama; kang katon dening len. Ring wong atua, kang kadi angemot i bapa i meme. Muang tan trena sira ring awak   sariranta muang tan gila sira mulating kang sarwa ginilan. Ararem yan mulating gurusaksi, gurupada, ndatan pandeleng saluhuring kapala, yan mulat ring ratu samangkana. Telas samangkana dharmaning netra kajarnia.

 

Kunang dharmaning karna, luirnia; Eda pati madingehang saluiring mahala, kang rahayu juga padingehang, prih darananing ngrenge juga tuten, ndatan prateja ring saluiring ala karenge, ndatan angalem ring sakaluiring ayu karenge, eda salah padingehan,  eda madingehang ujar tan krama, kramaning ulah ayu juga padingehang. Telas samangkana dharmaning karna kajarnia.

 

Kunang dharmaning kulit, luirnia; Buat darana ring panas tisning kulit, samahita juga ring wirasaning kulit, daraning salaraning kulit luirning lararaning kulit. Telas samangkana dharmaning kulit kajarnia.

 

Ika ta kramaning dharmaning dasendria nga. Kukudakena dening angen-angen mahening nirmala satata, ika tan len kabresihana de sang wiku, langgeng rahina wengi.

 

Nihan trimala, nga; tan kantinen de sang wiku luirnia; angen-angen angkara nga; buat caapala ring sesamane tumuwuh, pengkuh ambeke pangpang pungpung amungpang satata, buat angangken awake sugih, ceclemek, kumabisa, tenggah ring tua-tua, buat praceda ring wong len muang sang panditaaaa, iya juga bagus, iya juga ayu, iya juga nganggeh wruh ring kawah swarga mwang kabudine angunggul, angawang-awang, tan angga kociwa, singgih kumabisa dawak, anggak, brengga, kumakawi, prajnjan tan ana madani, wani budine, angungkuli wong ring wong kabeh, ajum, encek, murka buat kroda, amisuh anemah, adenggi ring sasamaning tumuwuh, iri, lepaasan, iya juga nganggeh wruh ring silakrama kabeh, putusing aji brata samadi yoga, muang wruh ring papegating aji kabeh, wruh tekeng panguwusani bawa kabeh muang papegating  tigasakti. Telas samangkana gunaning angen-angen angkara kajarnia. Ika ta kabeh tan kantinen de sang wiku.

 

Angen-angen loba nga; asing budi takut kikit, apang pada liu juga budinia suka pirak, yen kikit branti uring-uringan. Apang katekan budiania sarwa liu, pipis mas salaka pada liu, rajabrana, padi pada liu, somah liu pada ayu-ayu kabeh, abungah yan tumoning pianak liu, panjak liu, sarwa ipen liau, kebo, sampi, jaran, maisa, mesa, domba, ayam, bebek, angsa, dara pada liu, tur geget, credik, crewing, yen kelangan sedih kingking gung tangis, bekut, bengul, osah menggah-mengguh, uyang-ayingan. Yan angidih taan polih branti, yan tan polih branti, yan polih pirak; yan kaidihin, buat paweh, kunang yan amangan, buat winongin dria, ping telu ping pat sadina duh-duhan ring rasa enak, sabran dina tan kari sarwa iwak muang inum sarwa sajeng arak brem kabeh, uron-uron atura rahina wengi, asanggama rahina wengi, anganggo sarwa bungah, sarwa merab, yan nista nganggo gung runtik. Telas kudunia pracidra ring drewening len, angutilangen tal, ambegal, anayab, amaling, amlagandang, amurugul, amatimati tan padosa, adol wong, ananggap upah amrih bati tan surut, denia amrih kasugihan. Ndatan surut pamrihnia apang katekan amisesa jagat kabeh. Telas samangkana gunaning angen-angen kaloban kajarnia.

 

Kunang muah angen-angen tresna, nga; luirnia, buat wedi ring pati ring gring, ring lara, buat wedi ring mala pataka, buat wedi ning keweh luiring keweh, buat wedi ring sakaluiring sangkala, buat wedi ring karoga, luiring rorogan. Anging kewala pamrih budinia seger oger, aawluya jati paripurna maurip, warasa sadakala manutug tuwuh dirgayusa, tan kasurudan suka sugih, wedi kalaladan keweh-kewehning anak putu buyut muang wredining sarwa iwen, yaan kapatianing iwen, gung tangis menggah-menggah, luih kapatianing anak putu buyut, sampun tan pacamugaga, tan parupa tan pawarna, tan pagoba janma, kapati-pati denia, gung kapriatinan, dewa den pasuhi, kayangan den rubuh, dening gunning kapriatinan. Kunang yang tumoning aanak putu buyut pada paripurna seger-oger tan analahane. Ikaa ta suka lega manahnia tumon, abungah cecengah mahor gangga sada motah; adulur kenyang-kenyung pangucape sada jegir, tegake kadi tegak wawalene kancegan kaparaga dewa. Telas samangkana gunaning angen-angen katresnan kajarnia.

 

Ika ta gunaning trimala margining atmaning manusa mulih maring yamaniloka kajarnia, tumampuh ring kawah de sang yamabala. Luirnia wastuning kawah tiga prabedaning kawah; kawah tambragomuka, kawah tai, kawah endut siblagadaba. Angkara nga; kawah tambragomuka; lobha nga; kawah tai. Tresna nga; kawah endut siblagadaba. Ya doni trimala yogia kayatnakena de sang wiku, ya karaning hret ring jroning ati sakawisesaning trimala kabeh, brastakena ring jroning hredaya salawasing mahurip, adja aweh metua.

 

Kunang wineh metua nggeh ngulah maring aju juga pesuang, makasadana, semu teken munji apang pada ngulah kasor. Muah yan pageh samangkana, ika ta kajarnia marga mulih maring swargaloka sanghyang atma. Apan agung reko sih sanghyang dharmaraja iri kita, doning reko langgeng sanghyang atma amukti sarining sari.

 

Nihan kengetakena de sang wiku, alaning aturu ring rahina. Pupuk prih embuh satru, sagunging tapa bratanta rug sirna brasta tanpasesa, tur lungsuring kajaten, omah-omah rampung tanpasesa, wiadi tan pegat; ika ta panten nga; ya karaning papalinana de sang wiku maturu ring rahina, apan gung reka ilania.

 

Nihan tingkahing sang wiku amangan pindo sadina, yan ring inum, kewala brem muang madu kawasa inginum. Kunang saluiring sajeng arak tan yogia inumen de sang wiku. Yan amangan tan parowang, aroron, aturu tan pakaruwana, alungguh tan pakaruwan sabale.

 

Yatna sang wiku ahutang apiutangang. Kunang yan sang wiku ahutang, masatia ring pasamayania manahur. Kunang sang wiku apiutangang ndatan panagih, winong ring budining sang mahutang.

 

Kunang yan sang wiku angadol, telas tan panengker aji, aweh tur madulur mahimbuhin. Kunang yan sang wiku atuku ndatan panawah, tan panagih imbuh.

 

Muah ring sang wiku, telas tong ada amotoh-motohan saluiring jujuden, pan tan wiku hana murug.

 

Muah sang wiku tan amangan luiring parad-paridan, lamukajunan de sang guru, wenang sang wiku amangan.

 

Muah tan dadi sang wiku anglipeti teda, muang tan dadi sang wiku kahundang-hundangan, abeberukan.

 

Telas samangkana wastuning silanira sang amrih sewaka dharma; apan makadasaring kawikun. Kunang yan tan mangkana  dasar sang amrih kawikun, kajarnia birdon kawikunira, rug bubar tan pajamoga, apan sanghyang dharmaraja gung runtik ring sang wiku, salah surup, panten sang wiku mangkana.

 

Iti tuturwahia, away cawuh, away wera, gung ila-ila, poma.